په قطر کې د طالبانو سفیر سهیل شاهین وايي، چې دوی د واشنګټن په ډزو کې د پاکستان د لاس لرلو د احتمال په اړه تحقیقات غواړي. شاهین ویلي، چې کابل هیڅ امکان نه ردوي او دا چې یوه بې طرفه او مسلکي څیړنه باید د برید عاملان معلوم کړي.
د هند نیوز ۱۸ خبري اژانس وايي چې طالبانو په واشنګټن ډي سي کې سپینې ماڼۍ ته نږدې له ډزو وروسته سهیل شاهین ددې ډلې د رسمي دریځ وړاندې کولو د مسوول په توګه ټاکلی دی.
شاهین له نیوز ۱۸ سره په یوه مرکه کې وویل چې د طالبانو پالیسي روښانه ده او دا چې "افغان خاوره" باید د کوم فرد یا شبکې له خوا په بهر کې د بریدونو ترسره کولو لپاره ونه کارول شي.
کله چې د پیښې په اړه د پاکستان د پوځي استخباراتو د احتمالي رول په اړه وپوښتل شو، نیوز ۱۸ لیکلي چې هغه دا امکان رد نه کړ، خو ویې ویل چې ترڅو تحقیقات بشپړ نه شي څه نه شي ویلی.
هغه د پاکستان استخباراتي اداره تورنه کړه، چې هڅه کوي د طالبانو اعتبار ته زیان ورسوي او افغانان د امنیتي ګواښ په توګه په داسې وخت کې انځور کړي چې کابل د هند په ګډون نړۍ ته نږدې کیږي.
د طالبانو او ډیلي د اړیکو په اړه، شاهین وویل چې دا تعامل د ملي ګټو پر بنسټ ولاړ دی او د هند او افغانستان اړیکې تاریخي سابقه لري.
له ډزو وروسته د افغان کډوالو د پروسې پر وړاندې د سپینې ماڼۍ د سخت اقدام په اړه راپورونو ته په غبرګون کې سهیل شاهین وویل چې دا د متحده ایالاتو حکومت پورې اړه لري چې جامع تحقیقات وکړي.
د شاهین په وینا لومړني راپورونه ښیي چې بریدګر د پخواني افغان حکومت "په افغانستان کې امریکایي سرتیرو" سره د کار کولو سابقه لري خو حقیقت یوازې د تحقیقاتو له لارې معلومېدلی شي.
په دې وروستیو کې یو افغان رحمان الله لکڼوال د متحده ایالاتو د ملي ګارډ پر دوو سرتیرو ډزې وکړې، چې دواړه سرتیري یې ټپیان کړل خو یوه سرتیرې یوه ورځ وروسته د خپلو ټپونو له امله مړه شوه.
