د ملګرو ملتونو سرمنشي انتونیو ګوترېش د منځني ختیځ د سولې په اړه د ملګرو ملتونو د ۲۰۲۵کال د رسنیو نړۍوال سیمنار ته په خپله وینا کې وویل، په غزه کې د جګړو له پیل راهیسې د رسنیو ۲۶۰ کارکوونکي وژل شوي، چې دا د خبریالانو لپاره په وروستیو لسیزو کې تر ټولو خونړۍ جګړه بلل کېږي.
هغه همداراز ټینګار وکړ، چې خبریالان باید وکولای شي له ګواښ، زیان او لاسوهنې پرته خپلې رسنیزې چارې پر مخ یوسي.
هغه د دوشنبې په ورځ (د لیندۍ ۱۰مه) د سیمنار ګډونوالو ته په وینا کې زیاته کړه، چې نړۍواله ټولنه غواړي د غزې د جګړې د پای ته رسېدو لپاره د تلپاتې سولې د رامنځته کېدو هڅه وکړي، داسې سوله چې په کې اسراییل او فلسطین دواړه هېوادونه د یو بل تر څنګ، په ټاکلو سرحدونو او ارامه فضا کې ژوند وکړي.
هغه د سولې په بهیر کې د خبریالانو رول د شاهدانو او ریښتینو راپورکوونکو په توګه یاد کړ او ویې ویل: «ستاسو کار به وکولای شي په راتلونکو میاشتو کې د عادلانه سولې د ټینګېدو بنسټ کېږدي.»
