په بدخشان کې د یوې ټرافیکي پېښې له امله د یوې ښځې په ګډون څلور کسان مړه شوي
په بدخشان ولایت کې د طالبانو د امنیې قوماندانۍ ویاند احسانالله کامګار خبر ورکړی، چې د دغه ولایت په راغستان ولسوالۍ کې د یوې ټرافیکي پېښې له کبله د یوې مېرمنې په ګډون څلور کسان مړه او دوه نور ټپیان شوي دي.
د هغه په وینا؛ د یادې پېښې ټپیان روغتون ته لېږدول شوي دي. دغه پېښه پرون پنجشنبه (د لېندۍ ۱۳مه) د راغستان ولسوالۍ په «خواجه ملا» سیمه کې هغه مهال شوې، چې یو لنډکروزر موټر له سړکه اوښتی او د امو سېند ته لوېدلی دی.
