د طالبانو د عدلیې وزارت خبر ورکړی، د ځمکو د غصب مخنیوي کمېسیون د روان کال له پیل راهیسې په ټول هېواد کې نږدې ۷۶۱زره جریبه ځمکه چې په ناقانونه توګه نیول شوې وه؛ بېرته راګرځولې ده.
د دغه وزارت لهخوا په خپرې شوې خبرپاڼه کې راغلي، دغه ځمکې د کابل په ګډون د افغانستان په ۳۳ نورو ولایتونو کې راوګرځول شوې دي. د یاد وزارت د خبرپاڼې له مخې؛ د دغه ځمکو له ډلې د نږدې ۲۹زره جریبه ځمکو قضیې د طالبانو د غصب ځانګړو محاکمو ته د پرېکړې لپاره سپارل شوې، چې دامهال تر څېړنې لاندې دي.
خبرپاڼه زیاتوي، د کمېسیون له لوري د طالبانو د مشر په حکم یو ځانګړی پلاوی د بادغیس ولایت په مرکز او ۱۰ ولسوالیو کې د ۴ مېلیونه او ۱۶۷زره جریبه عامه څړ ځمکې پېژندلې او رسمي یې د ځمکو بانک کې ثبت کړې دي. دغه وزارت څرګنده کړې، چې د غصب شوې ځمکې د بېرته راګرځولو او د عامه ځمکو د قانوني ثبت په برخه کې یې اقدامات دوام لري.
د طالبانو د ځمکو د غصب د مخنیوي او غصب شویو ځمکو د استرداد کمېسیون د روان کال په پیل کې ویلي و، چې پر افغانستان د یادې ډلې له واکمنېدو وروسته نږدې ۴مېلیونه جریبه ځمکه له غاصبیتو راګرځول شوې ده.
د یادولو ده، چې د طالبانو د ځمکو د غصب مخنيوي او بېرته راګرځولو کمېسیون تر دې وړاندې ویلي و چې د «اراضۍ او غصب شویو ځمکو راګرځولو» په نوم نوی وزارت جوړوي. دغه کمېسیون ویلي و، چې د غصب شویو ځمکو د راګرځولو لپاره د نوي وزارت جوړولو فرمان صادر شوی دی.
دغه څرګندونې داسې مهال دي، چې تازه سرچینو افغانستان انټرنشنل ته ویلي د طالبانو عدلیې وزیر د نوي کابل پروژې د اوکسین اریانا شرکت له لارې شپږ ټوټې ځمکې په باج اخیستې دي. یوه ۱۲ بسوې ځمکه د وزیر د مېرمنې په نوم د سوداګریزې ځمکې په توګه ثبت شوې، درې نورې یې د درېیو زامنو او دوه ټوټې د وزیر د وروڼو په نوم ثبت شوې دي.
