د ایران مرستیال سفیر سید حسین مرتضوي د هرات لپاره د طالبانو له والي مولانا اسلامجار سره په کتنه کې د افغان کډوالو ستونزو، د دوهاړخیزو اړیکو پیاوړتیا او د سوداګریزو همکاریو پر پراختیا خبرې کړې دي.
په هرات کې د طالبانو د رسنیز دفتر لهخوا په خپره شوې خبرپاڼه کې د ښاغلي مرتضوي په حوالې راغلي، چې ایران له افغانستان سره د اړیکو د پراختیا او ټینګښت لپاره هڅه کوي. نوموړي ژمنه وکړه، چې د افغانانو لپاره د ویزو بهیر به اسانه او ساده کړي.
خبرپاڼه زیاتوي، چې په یاده ناسته کې د ایران جنرال قونسل علي رضا مرحمتي هم ګډون کړی و. هغه په یادې ناسته کې ویلي، هغه پېښه چې پهکې یوشمېر افغان کډوال د ایران پر پوله مړه شوي؛ د ایران عدلي محاکمو ته سپارل شوې، ترڅو ټول اړوند اسناد او لاملونه په هر اړخیز ډول وڅېړل شي.
په خبرپاڼه کې راغلي، د هرات لپاره د طالبانو والي مولانا اسلامجار د کډوالو د ستونزو پر وخت رسېدنې لپاره د ایران د لا زیاتو هڅو پر اړتیا ټینګار وکړ او له ایراني چارواکو یې وغوښتل چې د افغانانو لپاره د ویزو پروسه اسانه کړي.
هغه زیاته کړه، چې د طالبانو حکومت له ایران سره د ښو او تلپاتې اړیکو غوښتونکی دی او د سوداګریزو، ټرانزیټي راکړو ورکړو او د وګړو اړوند چارو اسانتیا د دواړو هېوادونو لپاره مهم دي.
