د اسراییل د دفاع وزیر: اسراییل له غزې هیڅکله هم په بشپړ ډول نه وځي
د اسراییل دفاع وزیر کاتز د سې شنبې په ورځ وویل چې د امنیتي دلیلونو له امله اسراییلی پوځ هیڅکله په بشپړ ډول له غزې څخه نه وځي او په دې فلسطیني سیمه کې به یو ملکي-پوځي ځواک هم جوړ شي.
د اسراییل دفاع وزیر کاتز د سې شنبې په ورځ وویل چې د امنیتي دلیلونو له امله اسراییلی پوځ هیڅکله په بشپړ ډول له غزې څخه نه وځي او په دې فلسطیني سیمه کې به یو ملکي-پوځي ځواک هم جوړ شي.
دا څرګندونې د امریکا د سولې له هغه پلان سره په ټکر کې دي چې د ۲۰۲۵ کال په اکتوبر کې اسراییل او حماس لاسلیک کړی و.
د پلان له مخې، اسراییلي ځواکونه باید په تدریجي ډول له غزې وتلي وای او په ساحلي سیمه کې د ملکي استوګنځایونو بیا جوړول منع شوي وای.
کاتز د حماس د ۲۰۲۳ کال د اکتوبر۷مې برید په اړه وویل، « موږ د غزې په ژوره برخه کې موقعیت لرو او هیڅکله به ټوله غزه پرې نه ږدو. داسې څه به هېڅکله نه ونه شي. موږ دلته د ساتنې لپاره یو، څو هغه څه تکرار نه شي، چې پېښ شول».
نوموړي د اسراییلي پوځ د ځینو واحدونو په اړه وویل، « کله چې وخت راورسېږي، په شمالي غزه کې به د هغو ټولنو پر ځای چې بېځایه شوې، د نحال واحدونه جوړ کړو. موږ به دا په سمه توګه او په مناسب وخت وکړو».
د نحال واحدونه د هغو ملکي کسانو لپاره جوړ شوي چې په پوځ کې د شمولیت لېوالتیا لري.
هغه په خپلو خبرو کې دا هم ویلي چې د غزې په شمال کې به نوي ښارګوټي جوړ شي.
نوموړي وویل: « دا ښارګوټي به د خپلې خوښې او تګلارې له مخې جوړوو».
کاتز ټینګار وکړ چې اسراییل باید د خپلو اتباعو د ساتنې لپاره د لبنان او سوریې په ګډون په ټولو سیمو کې حضور ولري او پر نورو د امنیتي مسوولیت د ترسره کولو باور نه لري.
