تر هغې وروسته چې د افغانستان د خبریالانو مرکز د ۲۰۲۵ کال په کلني راپور کې د رسنیو او خبریالانو د ازادۍ وضعیت «ډېر ترینګلی او محدودوونکی» وباله، د طالبانو د اطلاعاتو او کلتور وزارت ویاند دغه ارزونې او همداراز په هېواد کې پر رسنیو بندیزونه او د خبریالانو نیول او وژل رد کړي دي.
خبیب غفران د یکشنبې په ورځ (د مرغومي ۷مه) د طالبانو تر واک لاندې له ملي ټلوېزیون سره په خبرو کې ویلي، چې پر رسنیو هېڅ ډول محدودیتونه نهشته، بلکې د رسنیز سکتور د پیاوړتیا لپاره یوازې تګلارې او اصول وضع شوي دي.
د طالبانو د اطلاعاتو او کلتور وزارت ویاند همداراز زیاته کړه، ځینې خبریالان چې نیول شوي، د رسنیزو فعالیتونو له امله نه، بلکې د شخصي او حقوقي ستونزو له امله نیول شوي، خو د بیان ازادۍ ملاتړې ادارې بیا دا توجیه نهمني.
دا په داسې حال کې ده، چې د افغانستان د خبریالانو مرکز د ۲۰۲۵ کال په کلني راپور کې د روان کال د پېښو په اړه خبر ورکړی، چې پهکې د دوو خبریالانو وژل، د درېیو ټپي کېدل، د ۳۴ خبریالانو نیول او ۱۶۶ د ګواښونو پېښې ثبت شوې دي.
یاد مرکز ویلي، لا هم پنځه خبریالان د طالبانو په زندانونو کې بندیان دي.
خو که څه هم د طالبانو د اطلاعاتو او کلتور وزارت ویاند خبیب غفران بیا پر افغانستان د پاکستان د برید پرمهال یوازې د دوو خبریالانو وژل کېدل مني، په خبریالانو پورې نور اړوند خبرونه ردوي.
غفران د افغانستان د رسنیو وضعیت ښه ارزوي او وایي، چې د طالبانو له واکمنېدو وروسته شاوخوا ۱۸۰ رسنیزو بنسټونو نوي جوازونه ترلاسه کړي او سلګونه ځوانان پهکې پر کار بوخت دي، چې دا د رسنیز سکتور د پیاوړتیا نښه ده.
نوموړي بیا دا نهده څرګنده کړې، چې د طالبانو له واکمنېدو وروسته څومره رسنۍ د دوی د سختدریځو محدودیتونو له امله تړل شوې دي.
د افغانستان د خبریالانو مرکز په راپور کې ویل شوي، چې یوازې په تېرو ۱۲ میاشتو کې دوه ټلوېزیونونه او دوه راډیوګانې د سیاسي او امنیتي لاملونو له امله تړل شوي او د ښځینه وو لږ پاتې رسنۍ هم د جنسیتي تبعیض له امله د تړل کېدو له جدي ګواښ سره مخ دي.
د راپور لهمخې، په روان کال کې په ۱۷ ولایتونو کې په رسنیو کې د ژوندیو موجوداتو د انځورونو پر خپرولو هم بندیزونه لګېدلي دي او د ۲۰۲۴ کال راهیسې دا بندیز په ۲۳ ولایتونو کې پلي شوی دی.
