د طالبانو د کور او ښار جوړولو وزارت وايي، په کندهار او لغمان ولایتونو کې راستنېدونکو کورنیو ته څه باندې ۴۰۰ د استوګنې نمرې وېشل شوي او دغه بهیر همداراز دوام لري. له دې سره سم، یو شمېر راستنې شوې کورنۍ شکایت لري چې تر اوسه ورته د استوګنې لپاره ځمکه نهده ورکړل شوې.
د طالبانو د کور او ښار جوړولو وزارت د یکشنبې په ورځ (د مرغومي ۷مه) د یوې خبرپاڼې په خپرولو سره ویلي، د کندهار د ژېړۍ ولسوالۍ د کډوالو په ښارګوټي کې د راستنېدونکو کورنیو لپاره د ځمکو د وېش بهیر بشپړ شوی او په ترڅ کې یې شاوخوا ۴۰۰ کورنیو ته د سرپناه لپاره ځمکې وېشل شوې دي.
له دې سره سم، په لغمان کې هم هغو اړمنو کورنیو ته چې له کلونو کډوالۍ وروسته بېرته خپل ټاټوبي ته راستنې شوي د طالبانو په وینا، هغو لپاره د نمرو د وېش عملي بهیر پیل شوی او لا هم روان دی.
د طالبانو د ښار او کور جوړولو وزارت په لغمان کې راستنو شویو کورنیو ته د وېشل شویو استوګنیزو نمرو د شمېر په اړه څه نهدي ویلي.
طالبان وايي، پر راستنو شویو کورنیو د استوګنې د نمرو د وېش بهیر په ټولو ولایتونو کې روان دی.
په ورته وخت کې یو شمېر هغه کورنۍ چې په دې وروستیو کې له پاکستان او ایران څخه په جبري توګه هېواد ته اړول شوي شکایت لري، چې له ستنېدو یې ډېره موده شوې، خو لا تر اوسه ورته د سرپناه لپاره ځمکه نهده ورکړل شوې او همداراز د نورو مرستو پر غیر شفافوالي هم نیوکې لري.
