د اروپایي کمېسیون مشرې اورسولا وان ډرلاین د یکشنبې په ورځ له ولادیمیر زېلېنسکي، ډونالد ټرمپ او له اروپایي مشرانو سره تر ټلیفوني اړیکې وروسته وویل، چې ښه پرمختګ شوی او اوکراین پیاوړو امنیتي تضمینونو ته اړتیا لري.
هغې په ټولنیزې شبکې اېکس کې لیکلي: «اروپا چمتو ده چې له اوکراین او خپلو امریکايي شریکانو سره د دې پرمختګ د ټینګښت لپاره همکارۍ ته دوام ورکړي. د دې هڅو اساسي محور دا دی چې له لومړۍ ورځې پیاوړي امنیتي تضمینونه موجود وي.»
د برېتانیا د لومړي وزیر د دفتر ویاند هم اعلان وکړ، چې کېير سټارمر له ټرمپ، زېلېنسکي او د اروپایي مشرانو سره خبرې کړي او زیاته یې کړه، چې خبرې اترې په اوکراین کې د سولې پر راوستلو متمرکز و.
