ټاکل شوې ده، چې د امریکا ولسمشر او د اسراییل لومړی وزیر نن په فلوریډا کې سره وګوري؛ دغه ناسته به په غزه کې د اوربند او د جګړې د پای ته رسولو د «دویم پړاو» پر راتلونکي تمرکز ولري. د باخبره چارواکو په وینا، دغه پړاو له جدي اختلافاتو او ټولو خواوو ته د سیاسي درنو لګښتونو سره مخ دی.
د سياېناېن د راپور لهمخې، په دې کتنه کې به ټرمپ او نتنیاهو د سولې د هغه طرحې پر پرمختګ خبرې وکړي، چې له اکټوبر میاشتې راهیسې د اسراییل او غزې ترمنځ د جګړې د پای ته رسولو لپاره عملي کېږي.
که څه هم د دې طرحې لومړی پړاو عملي شوی، خو ټرمپ غواړي دویم پړاو ته داخل شي؛ هغه پړاو چې ډېر پېچلی بلل کېږي.
د باخبره سرچینو په وینا، دویم پړاو د حماس بېوسلې کول، د غزې بیارغونه او له جګړې وروسته د دې سیمې د حکومتدارۍ د میکانیزم ټاکل شامل دي.
خو اسراییل د دې پړاو د پیل شرط دا اېښی، چې د غزې له تړانګې د وروستي وژل شوي یرغمل پاتې شوني بېرته وروسپارل شي؛ هغه غوښتنه چې د درېیو اسراییلي سرچینو په وینا، د دې هېواد چارواکي پخپله هم پوهېږي چې ښايي حماس یې په بشپړ ډول پلي نهشي کړای.
په همدې حال کې حماس اعلان کړی، چمتو دی چې د خپلو وسلو د «ساتنې یا کنګل کولو» په اړه خبرې وکړي، خو دا لا روښانه نه ده چې دا وړاندیز به وکولای شي د اسراییل هغه غوښتنه پوره کړي، چې غواړي حماس باید بشپړ بېوسلو شي.
یوه مصري چارواکي مخکې سياېناېن ته ویلي وو: «دویم پړاو یوازې د یوې موضوع له امله نه دی درېدلی؛ بلکې ځکه بند پاتې دی چې د دې هر ګام د غزې راتلونکی ټاکي او ښکېل لوري لا هم نهدي چمتو چې د وروستي پرېکړهلیک سیاسي بیه ورکړي.»
