د طالبانو د کورنیو چارو وزارت امنیتي مرستیال ابراهیم صدر د پکتیکا په مرکز ښرنه کې له نشهیي توکو سره پر جدي مبارزې، د «قانون» تطبیق، د هر ډول تعصب پرېښودو، نظامي اصولو پر رعایتولو او د رسمي یونیفورم پر منظمې کارونې ټینګار کړی دی.
همداراز نوموړي د طالبانو مسووولینو ته لارښوونه کړې، چې د خلکو ستونزې په خپل وخت واوري او د حل لپاره یې عملي ګامونه پورته کړي.
ازبکستان په۲۰ باروړونکو موټرو کې بار۴۰۰ ټنه خوراکي توکي، درمل او طبي تجهیزات د بلخ ولایت په حیرتان بندر کې د طالبانو سیمه ییزو چارواکو ته وسپارل.
د طالبانو د بلخ ولایت د رسنیو او معلوماتو مرکز وايي، دغه مرستې د دوشنبې په ورځ بلخ ولایت ته وسپارل شوې، چې ۱۰ ډوله خوراکي توکي، درمل او طبي تجهیزات پکې شامل دي.
طالب چارواکي وایي، په دې مرستو کې ۹۶ ټنه اوړه، ۲۲ ټنه وریژې، ۲۰ زره قوطي د غوا غوښې کنسرو، ۲۲ ټنه بوره، ۲۰ زره لیتره لمرګل غوړي، ۱۸۰ زره چټک پخېدونکي خوراکي توکي،۴۰ ټنه ماکاروني او ۱۶۹ ټنه بېلابېل ډوله درمل او طبي تجهیزات شامل دي.
د یادو مرستو د تسلیمۍ په مراسمو کې د طالبانو د بلخ والي ملا محمد یوسف وفا، د افغانستان په چارو کې د ازبکستان د ولسمشر ځانګړي استازي عصمتالله ایرګشوف، د ازبکستان د سرخاندریا ولایت والي اولغبیګ قاسموف، د طالبانو د بلخ ولایت د بهرنیو چارو د استازولۍ مشر مولوي امینالله صادق، د سرې میاشتې د زون رییس مولوي میرزا محمد خالد، د طالبانو د بلخ د والي منشي حاجي حضرت علي او یو شمېر نورو ولایتي طالب مسوولانو ګډون درلود.
په بلخ کې د طالبانو محلي چارواکي وايي، چې دغه مرستې به پر اړمنو کورنیو او روغتیايي مرکزونو ووېشل شي.
د طالبانو د کابینې ۱۲مې غونډې د نفتو د تصفیې د معیاري کارخونو او راستنېدونکو کډوالو ته د اسانتیاوو رامنځته کولو اړوند بحث کړی دی. په دې ناسته کې ملا برادر ته دنده سپارل شوې، چې د نفتو د تصفیې کارخونو په اړه څېړنه وکړي چې ایا کولی شي معیاري نفت تصفیه کړي.
د طالبانو تر واک لاندې د ارګ نن دوشنبه، د مرغومي پر ۸مه نېټه وویل، چې ددې ډلې د کابینې دوولسمه غونډه د رییس الوزرا محمدحسن اخند په مشري شوې او ددې ډلې د ریاست الوزرا اقتصادي مرستیال ملا عبدالغني برادر په مشرۍ پلاوي ته دنده سپارل شوې چې په هېواد کې د نفتو د تصفیې کارخونو په اړه څېړنه وکړي چې ایا کولی شي معیاري نفت تصفیه کړي او که نه.
د ارګ د معلوماتو له مخې، همداراز سپارښتنه شوې، چې د نفتو د کارخونو په برخه کې پانګوال په معیاري توګه د کارخونې جوړولو او اړوندو ماشینریو ځای پرځای کولو ته وهڅوي.
د طالبانو د کابینې په دې غونډه کې د ددې ډلې د ریاست الوزرا د اداري مرستیال عبدالسلام حنفي په مشرۍ یو پلاوي ته دنده سپارل شوې، چې د ملا هبت الله له فرمان سره سم د کور او ښار جوړولو وزارت، کابل ښاروالۍ او د ښاروالیو چارو سمون عمومي ریاست استازو سره کښيني او خلکو او په ځانګړي ډول هغو کډوالو ته چې له ګاونډیو هېوادونو تازه راستانه شوي، د کورونو جوړولو په برخه کې اسانتیاوې رامنځته کړي.
د طالبانو لوړو زده کړو وزیر ندا محمد ندیم په کندهار کې د افغانستان کرنیزو علومو او ټکنالوژۍ پوهنتون محصلانو او استادانو ته په وینا کې ویلي، چې «له ځیرکو موبایلونو سره ډېره اړیکه مه ساتئ». ندیم ویلي، چې «ځیرک موبایلونه وخت ضایع کوي، استعداد، اخلاق او ان عقیده هم در خرابولی شي».
د طالبانو د لوړو زده کړو وزارت نن دوشنبه، د مرغومي پر ۸مه نېټه وویل، چې یاد وزارت وزیر ندا محمد ندیم کندهار ولایت ته د خپل سفر په ترڅ کې د افغانستان کرنیزو علومو او ټکنالوژۍ پوهنتون له رهبرۍ، استادانو او محصلینو ته سره کتلي دي.
ندیم په دې کتنو کې ویلي، چې تر څو علم وي، دین به وي او چې دین وي، دا دنیا به باقي وي، نو له همدې امله علم اوعلما لوړ مقام لري. هغه زیاته کړې، « علم هغه هستي ده چې د دنیا او اخرت خیر ورپورې تړلی دی».
خو طالبانو ددغه خیر دروازې د افغانستان د نجونو او ښځو پر مخ تړلې دي.
د طالبانو د لوړو زده کړو وزیر محصلینو ته ویلي، چې یوازې په نظري زده کړو بسنه ونه کړي او د پوهنتون مسوولانو ته یې سپارښتنه کړې، چې د محصلینو لپاره د عملي زده کړو زمینه برابره کړي.
د طالبانو د لوړو زده کړو وزیر له دې وړاندې هم له محصیلونو غوښتنه کړې وه، چې ځیرک موبایلونه کم وکاروي.
افغان شاعر، لیکوال او د هلمند ولایت د اطلاعاتو او کلتور ریاست پخوانی رییس علي شاه مظلومیار د ورپښې ناروغۍ له امله ومړ. مظلومیار ډېر وخت په هلمند ولایت کې په فرهنګي برخو کې کار کړی و.
د معلوماتو له مخې علی شاه مظلوم یار نن دوشنبه، د مرغومي پر ۸مه نېټه له دې نړۍ سترګې پټې کړې
په هلمند کې ځايي فرهنګیان وايي، چې علی شاه مظلوم یار د خپل ژوند ډېره برخه د فرهنګ، ادب، تاریخ او ولسي ارزښتونو خدمت ته وقف کړې وه.
په ورته مهال د کندهار پخوانی امنیه جنرال تادین خان اچکزي د علي شاه مظلومیار پر مړینې خواشیني ښکاره کړې ده او د هلمند ولایت فرهنګیانو او د نوموړي کورنۍ ته تسلیت ویلی دی.
د پاکستان د کراچۍ ښار په سهراب ګوټ ګنامنډي سیمه کې د یوې افغانې کورنۍ مړي موندل شوي، چې مور او د هغې درې واړه ماشومان پکې شامل دي.
په خپرو شویو انځوورنو کې څلور واړه د کوټې په چت پورې په دار را ځړېدلي ښکاري.
په وژل شویو کسانو کې۳۰ کلنه فاطمه، ۱۰ کلنه سونم، ۳ کلنه ارزو او دوه کلن ارمان شامل دي.
د سیمې پولیسو ویلي چې د وژل شوې میرمنې خاوند نجیبالله، چې د لیه ښار اوسېدونکی دی او په سبزي منډۍ کې کار کوي، نیول شوی او د پېښې په اړه پلټنې روانې دي.
د پولیسو د معلوماتو پر اساس، د نجیبالله بیان ښيي چې پېښه د کورنۍ شخړې له امله شوې ده.
پولیسود خپلو لومړنیو پلټنو له مخې ویلي، چېپېښه ځان وژنه ده.