د ولادیمیر پوتین اړوند استوګنځي باندې د اوکراین د برید د راپورونو له خپرېدو وروسته، د روسیې د بهرنیو چارو وزیر سرګي لاوروف اعلان وکړ، چې د سولې د خبرو په اړه د مسکو دریځ به بدل شي. د اوکراین ولسمشر بیا دا ادعا د کرملین لهخوا له واشنګټن سره د پرمختګ د بهیر د منحرفولو هڅه بولي.
لاوروف د دوشنبې په ورځ وویل، د روسیې د سولې د خبرو دریځ به وروسته له هغې بدل شي، چې اوکراین د نووګورود په سیمه کې د پوتین پر ویلا د بېپیلوټه الوتکې برید وکړ.
هغه د انټرفاکس خبري اژانس ته وویل: «دا ډول بېپروا اقدامات به بېځوابه پاتې نهشي» او پر اوکراین یې تور پورې کړ چې د دوشنبې په سهار یې د اوږده واټن ۹۱ بېپیلوټه الوتکو په وسیله د ولسمشرۍ د دولتي استوګنځي "والدای" هدف ګرځولی دی.
لاوروف دا نه ده څرګنده کړې، چې پوتین د یاد برید پر مهال په استوګنځي کې موجود و که نه. زېلېنسکي په غبرګون کې د مسکو ادعاوې د «روس فدراسیون یو بل دروغ» وباله.
هغه د دوشنبې مازدیګر له خبریالانو سره په خبرو کې وویل: «روښانه ده چې پرون مو د امریکا له ولسمشر ډونالډ ټرمپ سره ولیدل او دا هم روښانه ده چې د روسانو لپاره که زموږ او امریکا ترمنځ شخړه نه وي او موږ پرمختګ وکړو، دا د دوی لپاره یوه ماته ګڼل کېږي.»
زېلېنسکي زیاته کړه: «هغوی نهغواړي دا جګړه پای ته ورسوي او دا یوازې د فشار له لارې ختمېدلی شي. زه ډاډه یم چې دوی د یوې پلمې په لټه کې وو.»
هغه همداراز خبرداری ورکړ، چې د روسیې د بهرنیو چارو وزیر ادعاوې کېدای شي په اوکراین کې پر ملکي هدفونو په ځانګړي ډول په کییف کې پر مهمو دولتي ودانیو د نورو بریدونو لپاره زمینه برابره کړي.
