د پاکستان دفاع وزیر خواجه محمد اصف ویلي، دوی خبرو اترو ته چمتو دي؛ خو د تحریک انصاف ګوند ورسره ناوړه چلند کوي. د هغه په وینا؛ سره له دې چې د پاکستان لومړي وزیر شهباز شریف درې، څلور ځلې د خبرو اترو بلنه ورکړې؛ خو د تحریک انصاف ګوند له خبرو اترو انکار کوي.
تر دې وړاندې د پاکستان لومړي وزیر شهباز شریف د تحریک انصاف ګوند ته د خبرو اترو بلنه ورکړې وه. نوموړي د کابینې غونډې ته په وینا کې ویلي و، چې تر دې وړاندې یې هم د تحریک انصاف ګوند ته د خبرو اترو بلنه ورکړې وه او اوس د هېواد د پرمختګ لپاره یو وار بیا د خبرو بلنه ورکوي.
هغه زیاته کړې وه:« ما تحریک انصاف ګوند ته تر دې وړاندې هم د مذاکراتو بلنه ورکړې وه او اوس یو ځل بیا د مذاکراتو بلنه ورکوم؛ خو دغه مذاکرات یوازې د مشروع غوښتنو پربنسټ کېدای شي.»
د هغه په وینا؛ د پاکستان د پرمختګ او سوکالۍ لپاره باید د سیاسي ګوندونو ترمنځ همغږي رامنځته شي او د پاکستان حکومت د دې لپاره هر ډول ګام پورته کولو ته چمتو دی. خو د تحریک انصاف ګوند له حکومت سره له خبرو اترو انکار وکړ.
د پاکستان حکومت او تحریک انصاف ګوند ترمنځ اړیکې هغه مهال ترینګلې شوې، چې د دغه ګوند مشر او پخوانی لومړی وزیر عمران خان د پولیسو لهخوا ونیول شو. یاد ګوند تر دې وړاندې له پاکستان حکومت سره څو ځلې خبرې اترې پیل کړې؛ خو دغه خبرې بېپایلې پای ته ورسېدې.
