د نیویارک ښاروال زهران ممداني ویلي، چې د دغه ښار په راتلونکي تاریخ کې به د نورو نړۍوالو ژبو ترڅنګ پښتو ژبه هم مهم ځای ولري. هغه ویلي:« د نیویارک راتلونکی تاریخ به د نورو ژبو ترڅنګ په پښتو ژبه هم ولیکل شي.»
ممداني تر لوړې مراسمو وروسته په خپله وینا کې د نیویارک ښار د فرهنګي او ژبني تنوع په اړه ویلي، د دغه ښار اوسېدونکي به په بېلابېلو ژبو لکه پښتو، ماندرین، یدیش او کریول خبرې کوي چې دا د ښار د پراخ کلتوري هویت څرګندونه کوي.
د هغه په وینا؛ د نیویارک راتلونکی د کډوالو، بېلابېلو قومونو او ژبو په ګډون جوړېږي او هره ژبه د ښار د نوې کیسې د لیکلو برخه ده. زهران ممداني د نیویارک لومړی مسلمان ښاروال دی، چې د ۲۰۲۵کال په ټاکنو کې د لوړو رایو په ترلاسه کولو سره د دغه ښار نوی ښاروال وټاکل شو.
هغه ژمنه کړې، چې د نیویارک ټولې ټولنې به په حکومت کې شاملې کړي او هر کس د خپلې ټولنې استازیتوب کولای شي.
