د جاپان د لومړي وزیر دفتر د یوه لنډ پیغام په خپرولو سره د شمالي کوریا له لوري د یوه بالسټیک توغندي له توغول کېدو خبر ورکړی دی. شمالي کوریا لا تراوسه د دغې پېښې په تړاو څه نهدي ویلي.
د جاپان لومړي وزیر په دې پیغام کې چې په اېکسپاڼه خپور شوی، د تر لاس لاندې ادارو ته لارښوونه کړې، چې دغه پېښه په هر اړخیزه توګه وارزوي او خلکو ته پر وخت او مناسب معلومات وړاندې کړي.
هغه همداراز د جاپاني بېړیو او نورو شتمنیو پر خوندیتابه له ټينګار سربېره د بېړنیو حالاتو لپاره د چمتووالي په ګډون د احتیاط په موخه د ټولو تابیاوو د نیولو غوښتنه هم کړې ده.
د برېتانیې او فرانسې جنګي الوتکو د شنبې ورځې په ماښام (د مرغومي ۱۳مه) د سوریې په شمالي سیمو کې تر ځمکې لاندې تاسیسات چې د داعــ.ش له لوري کارول کېدل، په نښه کړي دي. د برېتانیا دفاع وزارت دغه عملیات بریالي بللي او زیاته کړې یې ده، چې هغه سیمه له ولسي وګړو خالي وه.
د برېتانیا دفاع وزارت د شنبې په ماخوستن (د مرغومي ۱۳مه) د یوې خبرپاڼې په خپرولو سره ویلي، دغه تاسیسات د پالمیرا لرغونې سیمې په غرنیزه ساحه کې موقعیت درلود او Paveway IV هدایت شویو بمونو سره په نښه شوي، خو په خبرپاڼه کې داعش ته د اوښتې مرګژوبلې په تړاو هېڅ نهدي ویل شوي.
د خبرپاڼې لهمخې، دغه تاسیسات د داعــ.ش لهخوا کارول کېدل او په وینا یې پهکې وسلې او چاودېدونکي توکي ساتل کېدل او همداراز په دغو عملیاتو کې ښکېلې الوتکې بېرته په خوندي ډول ستنې شوې دي.
خبرپاڼه کاږي، دغه سیمه له ملکي خلکو خالي ده او هېڅ داسې نښې نښانې نشته چې د ولسي وګړو ژوند ته دې هم خطر پېښ شوی وي.
د برېتانیا دفاع وزارت وايي، د شاهي هوايي ځواک الوتکې په سوریه کې خپلو هوايي ګزمو ته دوام ورکوي، څو په ۲۰۱۹ کال کې په سوریه کې د داعش له ماتې وروسته د دغې ترهګرې ډلې د بیا راټوکېدو هر ډول هڅه شنډه کړي.
د یادونې وړ ده، چې همدا څو ورځې مخکې په سوریه کې د داعش له لوري د امریکايي سرتېرو له وژل کېدو وروسته امریکايي هوايي ځواکونو هم په یاد هېواد کې د داعش پټنځایونه په نښه کړي و.
د ایران په خراسان رضوي، شیراز، اصفهان، تهران، ملکشاهي (ایلام)، مشهد او کرمانشاه سربېره په ګڼو نورو ښارونو کې له تېرو اوو ورځو راهیسې لا هم لاریونونه روان دي.
د خامنهیي لهخوا د لاریونکوونکو د ځپلو د ګواښ سربېره نن شپه هم په ګڼو ښارونو کې لاریونونه دوام لري او د ایران پر ضد شعارونه ورکوي.
د تهران او کرج ترمنځ په فردیس ښار کې نن د شنبې په شپه (د مرغومي ۱۳مه) هم لاریونونو دوام درلود او لاریونوالو د علي خامنهيي پر ضد شعارونه ورکول.
د تهران، کرج، مرودشت، قزوین او اصفهان څخه په خپرو شویو ویدیوګانو کې لېدل کېږي چې لاریونکوونکو نن د شپې تر ناوخته د حکومت پر ضد شعارونه ورکول.
همدارنګه ګڼو خلکو د احمداباد او مشهد ښارونو په کوڅو کې هم لاریونونه کړې دي او د حکومت پر ضد یې شعارونه ورکول.
بلخوا، ځینو رسنیو د لاریونکوونکو پروړاندې د ایراني ځواکونو لهخوا د تاوتریخوالي ډک چلند په اړه هم راپورونه خپاره کړي دي.
په ورته مهال یو شمېر امریکا مېشتو ایرانیانو هم په واشنګټن کې د ایران د ګټو ساتنې دفتر مخې ته لاریون کړی او ویل کېږي، چې د یاد اعتراض هدف په ایران کې د روان وضعیت په اړه د نړۍوالې پام اړول ښودل شوی دی.
د جمهوري نظام پر مهال د خوست پخوانی والي محمد حلیم فدايي وايي، امریکا پر ونزوېلا په برید سره نړۍ ته دا پیغام ورکړ، چې په نړۍوالو چارو کې د امریکا دریځ او خبره لا هم لومړۍ او اغېزناکه ده. د نوموړي په وینا، په افغانستان کې د امریکا له «ماتې» وروسته، ستراتیژيک مخالفین یې زړور شوي و.
امریکا د شنبې په سهار د ونزوېلا پر پلازمېنې برید وکړ او ورسره یې د ونزوېلا ولسمشر او مېرمن یې ونیول او د نیویارک یوې پوځي اډې ته لېږدول شوي دي.
د ونزوېلا ولسمشر نیکولاس مادورو د امریکا له لوري د ترهګرۍ او نشهیي توکو د قاچاق په ګډون پر بېلابېلو جرمونو تورن دی او ټاکل شوې چې په نیویارک کې محکمې ته حاضر کړای شي.
د ونزوېلا حکومت د امریکا د دغې چارې په تړاو ویلي، د امریکا د برید موخه «د دغه هېواد د تېلو او کاني سرچینو» لاندې کول دي.
محمد حلیم فدايي هم د شنبې ورځې په ناوخته (د مرغومي ۱۳مه) په خپله اېکسپاڼه وویل، امریکا پر ونزوېلا په برید او همداراز د ولسمشر مادورو او د هغه د مېرمنې د نیولو پېښې نړۍ ته دا پیغام ورکړ، چې د نړۍ په چارو کې د امریکا دریځ او خبره لا هم لومړۍ او اغېزناکه ده.
فدايي زیاته کړې: «په افغانستان کې له ماتې وروسته د امریکا د ځواک په اړه د امریکا ستراتیژیک مخالفان هم شکمن او هم زړور شوي و. په دې عمل سره امریکا یو ځل بیا خپل ځواک نړۍ ته وښود».
د نوموړي په باور، دا چې د ولسمشر ټرمپ دغه ډول برید قانوني او اخلاقي جواز لري که نه، هغه څه دي چې د ټرمپ په څېر ولسمشران پرې ډېر اندېښمن نهوي، خو د نويو نړۍوالو شرایطو په رڼا کې، د نړۍوال نظم د بیا کتنې او سمون په برخه کې دا ډول اقدامات ممکن او متصور دي.
له دې سره سم، د افغانستان د مخکېني ولسمشر مرستیال امرالله صالح د امریکا د سپنې ماڼۍ له لوري د ونزوېلا د نیول شوي ولسمشر مادورو د عکس په بیا خپرولو سره دا د حیرانۍ وړ بللې، چې امریکا به په افغانستان کې د شل کلن حضور پر مهال په پاکستان کې د «کوټې شورا» او دا چې طالبان له هغه هېواده قطر ته تلل راتلل په اړه هېځ معلومات نهدرلودل.
د ایران مذهبي مشر علي خامنه یي، نن د شنبې په ورځ په ایران کې د لاریونونو په اړه غبرګون وښود او ویې ویل چې لاریون کوونکو خبرې سمې وې. هغه وویل:«لاریون مناسب دی مګر لاریون بلوا نه ده، موږ له لاریون کونکو سره خبرې کوو خو له بلواګرو سره خبرې کول هیڅ ګټه نه لري.»
هغه ټینګار وکړ چې بلواګر باید په خپل ځای کې کښېنول شي.
د ایران مشر د ډالر د بیې د لوړوالي په وړاندې د دوکاندارونو لاریون، لاریون وباله خو د لاریون کوونکو او بلواګرو ترمنځ یې توپیر وکړ.
هغه وویل، چې دا د منلو وړ نه ده چې«د ګواښمن دښمن اجیرانو یوه ډله د دوکاندارانو تر شا درېدلې او د اسلام ضد، ایران ضد او د اسلامي جمهوریت ضد شعارونه ورکړي.»
د ایران مذهبي مشر د ډالر د بیې لوړوالی د «دښمن» کار وباله او د ایران له ولسمشر څخه یې وغوښتل چې دې ته رسیدګي وکړي.په ایران کې له شپږو ورځو راهیسې اعتراضي لاریونونه روان دي. دغه لاریونونه د ډالر پر وړاندې د تومان د ارزښت د رالوېدو له امله راوتي او د راپورونو لهمخې، دولتي ځواکونو پر معترضینو ډزې هم کړي او له امله یې مرګ ژوبله هم اوښتې، خو کره شمېر یې لا تراوسه مشخص شوی نهدی.
له دې سربېره ویل کېږي یو زیات شمېر معترضین د دولتي ځواکونو له لوري هم نیول شوي او ورسره هم مهاله د دغه هېواد ولسمشر مسعود پزشکیان له دلیل پرته د خلکو د نیولو په اړه ویلي، چې د خلکو لپاره باید ستونزې جوړې نهشي.
د سيبياېس ټلوېزیوني شبکې یو خبریال ادعا کړې چې د امریکا ولسمشر ډونالد ټرمپ په وینزویلا کې د پوځي تاسیساتو په ګډون پر یو شمېر اهدافو د برید امر ورکړی. بل خوا ددغه امر په غبرګون کې د وینزوئلا حکومت بېړنی حالت اعلان کړی دی.
د سيبياېس خبریال د اېکس له لارې لیکلي چې د امریکا ولسمشر ډونالد ټرمپ په وینزویلا کې د بریدونو د ترسره کېدو لارښوونه کړې ده. د راپور له مخې، یاد بریدونه د وینزویلا د پلازمېنې کاراکاس په ګډون پر ځینو مهمو هدفونو متمرکز دي.
ورته مهال، د وینزویلا حکومت ویلي چې ولسمشر نیکولاس مادورو د «ملي بېړني حالت» اعلان کړی او د امریکا وروستي اقدامات یې غندلي دي. د کاراکاس چارواکو ادعا کړې چې واشنګټن به د وینزویلا د طبیعي سرچینو په نیولو بریالی نه شي.
د سیمهییزو سرچینو په وینا، د شنبې سهار د ځایي وخت له مخې، په کاراکاس کې لږ تر لږه د ۷چاودنو غږونه اورېدل شوي او د ټیټې ارتفاع الوتکو د الوتنې غږونه هم ثبت شوي دي.
تر اوسه د امریکا له لوري د دې ادعاوو په اړه رسمي څرګندونې نه دي خپرې شوې.
