روسیې د اوکراین په اودېسا سیمه کې د چارشنبې په ورځ دوه بندرونه په نښه کړل، چې په پایله کې یې یو کس وژل شوی او اته نور ټپیان دي. روسیې په تېرو څو اونیو کې د اوکراین پر بندرونو او له دغو بندرونو پر وتونکو بهرنیو بیرغ لرونکو بېړیو څو ځله بریدونه کړي دي.
د اوکراین د بندرونو ادارې ویلي، مسکو چورنو مورسک او پیوډنی بندرونه هدف ګرځولي، چې دواړه د اوکراین مهم سوداګریز بندرونه دي.
د اوکراین د بندرونو ادارې ریټرز ته وویل چې روسیې په ۲۰۲۵ کال کې په اوډېسا سیمه کې ۹۶ ځله بندرونه په نښه کړي، چې د ۲۰۲۴ کال په پرتله درې برابره زیاتوالی ښيي.
امریکا هڅه کوي له وینزویلا سره تړلې د نفتو هغه کښتۍ ونیسي چې د روسیې بیرغ پرې رپیږي. دا اقدام د ولسمشر ډونالډ ټرمپ د هغه سیاست برخه ده، چې هدف یې د امریکا په شاوخوا سیمو کې د تېلو بهیر تر خپل کنټرول لاندې راوستل دي، خو د روسیې او امریکا ترمنځ د نوې شخړې خطر زیاتوي.
د رویټرز د چارشنبې راپور له مخې، د امریکا ساحلي ساتونکو او پوځ هڅه کړې هغه کښتۍ ونیسي چې تېره میاشت یې د تلاشي اجازه نه وه ورکړې. دا اقدام د روسیې او امریکا ترمنځ د نوې شخړې خطر زیاتوي، ځکه د پېښې په شاوخوا کې د روسیې پوځي بېړۍ او حتا یو اوبتل موجود و. روسیې او چین دواړو د امریکا دا چلند غندلی او دا یې زور کارونه بللې ده.
ټرمپ څرګنده کړې چې امریکا به د وینزویلا نیول شوي تېل د نړیوالو بازارونو په بیه وپلوري او عواید به یې د امریکا حکومت تر کنټرول لاندې اداره کیږي، چې د ده په وینا دا پیسې به د امریکا او وینزویلا د خلکو په ګټه ولګول شي.
نوموړي همدارنګه ویلي چې غواړي د وینزویلا تر ټولو سترې د تېلو زېرمې د امریکایي شرکتونو په مرسته اداره کړي.
همدارنګه، د امریکا او د وینزویلا دولتي تېلو شرکت (PDVSA) ترمنځ د یوې موافقې خبرې روانې دي چې له مخې به یې ځینې د تېلو بارونه چې چین ته تلل، امریکا ته واوړي. چین، چې د وینزویلا د تېلو لوی پېرېدونکی دی، دا غوښتنه په کلکه غندلې ده.
راپورونه وایي چې د نیکولاس مادورو د نیولو پر مهال لسګونه امنیتي کسان وژل شوي او مادورو اوس په امریکا کې د مخدره موادو په تړاو محاکمه کېږي. سره له دې، امریکا دا مهال د هغه له نږدې متحدینو سره کار کوي چې د وینزویلا د تېلو سکتور بېرته ژوندی کړي، نه دا چې ژر سیاسي بدلون یا ازاد انتخابات وکړي.
د وینزویلا اپوزیسیون، په ځانګړي ډول ماریا کورینا ماچادو، تر ډېره څنډې ته پاتې دی، خو هڅه کوي له امریکا سره اړیکې خرابې نه کړي. په ورته وخت کې، امریکا د وینزویلا لوړپوړو چارواکو ته خبرداری ورکړی چې که همکاري ونه کړي، د مادورو په شان به له سختو پایلو سره مخ شي.
د ایران د بهرنیو چارو وزیر عباس عراقچي وايي، تهران د واشنګټن پرمخ د خبرو اترو دروازې نه دي تړلي، خو د امریکا اوسني سیاستونه د مذاکراتو لپاره مناسبه فضا نه برابروي.
عراقچي چې د چارشنبې په ورځ یې د ایران د وزیرانو تر غونډې وروسته له خبریالانو سره خبرې کولې، ټینګار وکړ چې تهران هېڅکله د مذاکرې مېز نه دی پرېښی او تل د ګډو ګټو او متقابل درناوي پر بنسټ خبرو ته چمتو دی، خو د ده په وینا، د امریکا اوسنی حکومت له داسې چلند څخه کار نه اخلي.
عراقچي دا څرګندونې په داسې حال کې کوي چې په کور دننه ایران کې په بېلابېلو ښارونو کې لاریونونو زور اخیستی چې له امله یې یو شمېر لاریون وال هم وژل شوي دي.
د امریکا ولسمشر ډونالډ ټرمپ ایران ته ګواښ کړی چې که له لاریون کوونکو سره تاوتریخوالی او د هغوی وژل ادامه پیدا کړي نو، واشنګټن به مداخله وکړي.
د امریکا د پوځي عملیاتو په لړ کې د وینزویلا د ولسمشر له نیولو وروسته، باور دا دی چې اوس د ایران نوبت دی او که له ټرمپ سره جوړجاړی ونه مني ښایي ایران هم د وینزویلا له برخلیک سره مخ شي.
دا په داسې حال کې ده چې یو شمېر هېوادنه اوس له ایران څخه د خپلو وګړو د اېستلو په حال دي.
د اسټرالیا حکومت د سفر لارښود رسمي وېبپاڼې «سمارټټراول» له لارې خپلو وګړو ته خبرداری ورکړی، چې په ایران کې له تاوتریخوالي ډک لاریونونه د پراختیا په حال کې دي او دوی باید سملاسي دغه هېواد پرېږدي.
عراقچي د خپل راتلونکي سفر په اړه چې لبنان ته به یې وکړي، وویل چې تهران د بیروت له ټولو دولتي بنسټونو سره د اړیکو د پراخولو پلان لري. د عراقچي په وینا، ایران غواړي له لبنان سره سیاسي، اقتصادي او دولتي اړیکې نورې هم پیاوړې کړي او دا موخه د دواړو لوریو ګډه غوښتنه ده.
د ده په وینا، له نوموړي سره به یو اقتصادي پلاوی هم مل وي چې د سوداګرۍ او پانګونې فرصتونه وارزوي او هیله ده چې په نږدې راتلونکي کې اقتصادي همکاري لا نوره پراخه شي.
عراقچي د ایران د کورنیو چارو په اړه هم څرګنده کړه چې داخلي مسایل یوازې د ایران په خلکو پورې تړلي دي او هېڅ بهرنی هېواد حق نه لري چې د تهران په داخلي چارو کې مداخله وکړي.
د پاکستان د کورنیو چارو فدرالي وزیر محسن نقوي ویلي، چې په اسلاماباد کې به د چینایي وګړو د امنیت لپاره یو ځانګړی ساتونکی ځواک جوړ شي. نوموړي دا خبره د چین د عامه امنیت وزارت په مرکزي دفتر کې له خپل چینایي سیال سره د لیدنې پر مهال کړې.
محسن نقوي د پاکستاني پلاوي په ملتیا د چین د عامه امنیت وزارت مرکزي دفتر کې د چین د کورنیو چارو وزیر وانګ شیاوهونګ سره لیدلي او شاوخوا درې نیم ساعته ناسته یې کړې ده.
د پاکستان د کورنیو چارو وزارت ویلي، چې په دې ناسته کې د پاکستان او چین ترمنځ پر دوهاړخیزو اړیکو او د ترهګرۍ پر وړاندې پر ګډو اقداماتو خبرې وشوې.
دواړو لوریو هوکړه کړې چې د پاکستان او چین ګډ کاري ګروپ به هرې درې میاشتې وروسته غونډه کوي. همدارنګه پرېکړه شوې چې د دواړو هېوادونو د کورنیو چارو وزیران به هر کال یو ځل سره ګوري.
چین په پاکستان کې د خپلو وګړو او د چینايي شرکتونو د کارکوونکو د خوندیتوب له اړخه اندېښمن دی.
په پاکستان کې چینايي اهداف وخت ناوخته ددغه هېواد د وسله والو جنګیالیو له لوري په نښه کیږي.
د ایران قضایه قوې اړوند «میزان» خبري اژانس د چهارشنبې په ورځ (د مرغومي ۱۷مه) راپور ورکړی، چې د علي اردستاني په نوم یو ایرانی وګړی «اسراییل ته د جاسوسۍ» په تور اعدام شوی دی.
دغه اژانس ویلي، «علي اردستاني د خواله رسنیو له لارې د اسراییل د استخباراتي او ترهګریز سازمان موساد لهخوا جذب شوی و او د ټاکلو پیسو او بېبنسټه ژمنو په بدل کې یې موساد ته ماموریتونه ترسره کړي دي.»
د راپورونو له مخې؛ د ۱۲ ورځنۍ جګړې له پای ته رسېدو وروسته د ایران حکومت یوشمېر نور ایراني وګړي هم اسراییل ته د جاسوسۍ په تور اعدام کړي دي. ویل کېږي، چې د دغه کسانو محاکمه د مدافع وکیل پرته په غیرعلني محکمو کې ترسره شوې ده.
له بل پلوه د بشري حقونو فعالانو د دغه قضیو د څېړلو بهیر ناعادلانه او له قانون سره په ټکر کې بللی.
ایران انټرنشنل په یوه ځانګړي راپور کې ویلي، چې له څلورو ورځو راهیسې ایرانپلوه عراقي وسلهوالو د ایران د لاریونونو د ځپلو په موخه د ایراني ځواکونو د ملاتړ لپاره د خپلو کسانو جلب او جذب پیل کړی دی. سرچینې زیاتوي، تر دې دمه شاوخوا ۸۰۰ عراقي شیعه وسلهوال ایران ته استول شوي دي.
ایران انټرنشنل په خپل ځانګړي راپور کې ویلي، چې ایران ته لېږدول شوي ۸۰۰ عراقي شیعه وسلهوال زیاتره د کتایب، حزبالله، حرکتالنجباء، سیدالشهدا او بدر ډلو غړي دي.
په خبر کې راغلي، چې د عراق حکومت له ایران سره د مرستې لپاره د دې ځواکونو له خوځښت څخه خبر دی.
ایران انټرنشنل ته رسېدلي راپورونه ښيي، چې د دغو ځواکونو لېږد د شلمچې، چذابه او خسروي له درېیو سرحدي دروازو ترسره کېږي او رسمي لاره یې «مشهد ته د امام رضا د مقدسو ځایونو د زیارت سفر» ښودل شوې ده. خو په واقعیت کې دغه ځواکونه په اهواز کې د خامنهیي په اډه کې راټولېږي او بیا بېلابېلو سیمو ته د تاوتریخوالي ډکو لاریونونو د ځپلو لپاره استول کېږي.
