د طالبانو امنیتي ځواکونو په کابل کې د جرمني د پخوانیو محلي کارکوونکو د کورنیو د استوګنې مېلمستون پلټلی دی. په دغه مېلمستون کې د جرمني حکومت په لګښت څو افغانې کورنۍ اوسیږي، چې د غړو شمېر یې څو دیرش تنو ته رسېږي.
دغه کسان د جرمني د منلو له ژمنې سره سره له پاکستان نه ایستل شوي وو او وروسته بېرته افغانستان ته ستانه شول.
د جرمني د اې ار ډي ټلویزیون د رپوټ له مخې، طالبانو د هغو افغان کورنیو پلټنه کړې، چې د جرمني د منلوله ژمنو سره سره لا هم برلین ته نه دي لېږدول شوي.
د راپورونو له مخې، د طالبانو امنیتي ځواکونو تېره شپه په کابل کې یاد مېلمستون پلټلی او ځینې کسان یې څو ساعته پوښتلي، د هغوی موبایلونه یې ضبط کړي او د پوښتنو پروسه یې په ویډیويي ډول ثبت کړې ده.
ویل کیږي له دوی نه پوښتل شوي وو، چې ولې غواړي جرمني ته لاړ شي.
په دغه مېلمستون کې د جرمني د حکومت په لګښت څو افغانې کورنۍ ځای پر ځای شوې، چې د غړو شمېر یې څو دیرش تنو ته رسېږي. ځینې د جرمني پخواني محلي کارکوونکي دي او نور د جرمني د کوربهتوب پروګرام کې شامل دي.
د طالبانو د کورنیو چارو وزارت ویاند ددې پلټنې په اړه تراوسه څه نه دي ویلي.
