د برېټانیا شهزاده هري د امریکا د ولسمشر ډونالډ ټرمپ د وروستیو جنجالي څرګندونو په غبرګون کې ویلي، چې په افغانستان کې د ناټو ځواکونو د قربانیو او سرښندنو په اړه باید «له درناوي او رښتینولۍ» سره خبرې وشي.
نوموړی دغه څرګندونې په داسې حال کې کوي، چې دوه ځله یې د افغانستان د جګړې په لومړۍ کرښه کې پوځي خدمت ترسره کړی دی. هغه وایي، ډېر نږدې ملګري یې له لاسه ورکړي دي. نوموړي زیاته کړه، یوازې د برېټانیا ۴۵۷عسکر په افغانستان کې د ناټو د ګډ ماموریت پر مهال وژل شوي دي.
دا څرکندونې وروسته له هغې کېږي، چې ډونالډ ټرمپ په افغانستان کې د ناټو ځواکونو د ګډ ماموریت په تړاو نانندریزې خبرې وکړې. ټرمپ ویلي، چې په افغانستان کې د ماموریت پر مهال د ناټو ځواکونه د «جګړې له لومړۍ کرښې ډېر شاته او لرې» پراته وو.
شهزاده هري وویل: «یوازې د برېټانیا څخه ۴۵۷ پوځیان په افغانستان کې ووژل شول. مېندو او پلرونو خپل زامن او لوڼې خاورو ته وسپارلې او داسې ماشومان پاتې شول چې له پلار یا مور پرته لوی شول». په همدې حال کې د برېټانیا لومړي وزیر کېیر سټارمر هم له ډونالډ ټرمپ څخه غوښتي، چې د خپلو «سپکو او شرموونکو» څرګندونو له امله بښنه وغواړي.
خو د سپینې ماڼۍ ویاندې د سټارمر د دې غوښتنې په ځواب کې ټېلګراف ورځپاڼې ته ویلي: «ولسمشر ټرمپ سم وایي؛ د ناټو په چوکاټ کې د امریکا ونډه د نورو هېوادونو پرتله ډېره زیاته ده». هغې زیاته کړه، چې ټرمپ وتوانېد اروپايي غړي هېوادونه اړ کړي یا وهڅوي، څو د خپلې ملي بودیجې ډېره برخه د پوځي دفاع لپاره ځانګړې کړي.
د ملګرو ملتونو د بشري مرستو د همغږي کوونکي دفتر یا اوچا خبرداری ورکړی، چې د روان ژمي په درشل کې له هرو پنځو کسانو دوه کسان یې بشري مرستو ته اړتیا لري.
اوچا د جمعې په ورځ (د سلواغې ۳مه) راپور ورکړی، چې په نورستان کې د زیاتو ورښتونو له امله د غره یوه لویه ډبره ښویېدلې او همداراز د افغانستان په ځینو سیمو کې د یو شمېر کورونو چتونه هم رالوېدلي دي.
یوازې د ننګرهار په نازیان او لعلپورې ولسوالیو کې (جمعه- د سلواغې ۳مه) د همدې ورښتونو له امله د دوو کورونو چتونه رالوېدلي او له امله یې یوه یو کلنه ماشومه مړه شوې او مور و پلار یې ژوبل شوي او همداراز ۳ نور ماشومان هم ژوبل شوي دي.
تر دې مخکې یونېسف په خپله اېکسپاڼه لیکلي وو، چې د تېرې شپې په اوږدو کې د واورې ورېدنې له امله د افغانستان په ختیځ کې د زلزلهځپلو ماشومانو وضعیت لاپسې سخت شوی دی. یونېسف زیاته کړې، په افغانستان کې اړمن کسان بېړني او ډېرو مرستو ته اړتیا لري.
د ملګرو ملتونو د بشري مرستو همغږي کوونکي دفتر یا اوچا یو ځل بیا ټینګار کړی، چې افغانستان لا هم د نړۍ په کچه تر ټولو لوی بشري ناورین تجربه کوي.
اوچا په افغانستان کې په سملاسي توګه د ۱۷ اعشاریه ۵ میلیونه کسانو د لاسنیوي لپاره د ۱ اعشاریه ۷ میلیارده ډالرو غوښتنه کړې ده.
د یادونې وړ ده، چې د هوا پوهنې ریاست وړاندوینه کړې، چې د شنبې په ورځ به هم په بدخشان، نورستان، کونړ، ننګرهار، پنجشیر، کاپیسا، لوګر، لغمان، پکتیا او خوست ولایتونو کې له توپان سره مل واوره او بارانونه وي.
