د خیبر پښتونخوا اعلی وزیر محمد سهیل خان اپریدي اعلان کړی، چې نوموړی په راولپنډۍ ښار کې د اډیاله زندان مخې ته رسېدلی، څو د خپل ګوند د مشر عمران خان د روغتیایي وضعیت په تړاو معلومات ترلاسه کړي. راپورونه دي چې پخوانی لومړی وزیر له زندان څخه روغتون ته وړل شوی.
سهیل اپريدي د پنجشنبې په ماخوستن (د سلواغې ۹مه) په خپله فېسبوک پاڼه لیکلي، چې دی له خپلو ایالتي وزیرانو او د تحریک انصاف له غړو سره یو ځای اډیاله زندان ته رسېدلی، خو لا هم نهدی توانیدلی چې له عمران خان سره وګوري. هغه وایي، تر هغې پورې به د زندان له دروازې لاړ نهشي، څو چې د پخواني لومړي وزیر د روغتیا په تړاو ډاډ ترلاسه نهکړي.
نوموړي زیاته کړې: «د عمران خان له شخصي ډاکټر سره تر لیدنې وروسته به اصلي دریځ روښانه کړو او دا کاروان به یو ګام هم بېرته په شانهځي».
سهیل اپریدي همداراز ویلي، چې د دوی مبارزه د دې شاهدي ورکوي چې د پاکستان حکومت هېڅکله هم د حق نظریات زنداني کولای نهشي او نه یې چوپ کولای شي.
د عمرانخان د روغتیا په اړه له اندېښنو سره هممهاله د پاکستان د اطلاعاتو وزیر عطاالله تارړ وايي، د دغه هېواد پخوانی لومړی وزیر چې په اډیاله زندان کې بند دی؛ د طبي درملنې لپاره د اسلاماباد (پیمز) روغتون ته وړل شوی و. نوموړي د خان روغتیايي حالت د ډاډ وړ ښودلی.
د تحریک انصاف غړو تر دې دمخه هم د عمران خان د روغتیایي وضعیت په تړاو اندېښنې ښوولې وې او د شهباز شریف حکومت ګوندي غړو او ان د خان کورنۍ ته هم اجازه نه وه ورکړې، څو له هغه سره ملاقات وکړي.
د اسلاماباد یوې محکمې د سهیل اپریدي د نیولو حکم صادر کړی دی | افغانستان انټرنشنل پښتو
دا په داسې حال کې ده، چې د اسلاماباد یوې محکمې پر دولتي ادارو د بېبنسټه تورونو لګولو په قضیه کې د خېبرپښتونخوا د اعلی وزیر سهیل اپریدي د نه حاضرېدو له امله د هغه د نیولو امر هم صادر کړی دی.
