د پاکستان په بلوچستان ایالت کې د بلوڅ وسلهوالو د خونړیو بریدونو له ترسره کېدو وروسته، د دغه هېواد د دفاع وزیر د تور ګوته د افغانستان پر لور نیولې ده. خواجه اصف د دوشنبې په ورځ ادعا وکړه، چې په بلوچستان کې د فعالو بلوڅ وسلهوالو ډلو مشران په افغانستان کې مېشت دي.
پاکستان تر دې وړاندې هم افغان طالبان تورن کړي وو، چې د تحریک طالبان پاکستان (TTP) مشرتابه ته یې په افغانستان کې پناه ورکړې ده.
د پاکستان د دفاع وزیر د دوشنبې په ورځ د (سلواغې ۱۳مه) د دغه هېواد پارلمان ته ولاړ او د بلوچستان د امنیتي وضعیت په اړه یې استازو ته معلومات ورکړل. نوموړي وویل، حکومت به هېچا ته اجازه ور نهکړي چې تاوتریخوالی د ازادۍ غوښتنې تر نامه لاندې یا د هغې په چوکاټ کې توجیه کړي.
خواجه اصف زیاته کړه، هغه وسلهوال عناصر چې په بلوچستان کې فعالیت کوي، له بهرني ملاتړ څخه برخمن دي او ادعا یې وکړه، چې د طالبانو تر واک لاندې افغانستان د دې ایالت د ناامنۍ په پراخېدو کې رول لري. د هغه په وینا، د دغو ډلو له مشرتابه څخه په عملي ډول له افغانستان څخه ملاتړ کېږي.
طالبانو بیا بیا په افغانستان کې د پاکستاني وسلهوالو په ګډون د بهرنیو وسلهوالو د حضور ادعاوې رد کړې دي؛ خو د ملګرو ملتونو د امنیت شورا راپورونه ښيي چې طالبان د افغانستان له خاورې پر پاکستان د ټيټيپي د بریدونو مخه نه نیسي.
خواجه اصف همدارنګه وویل، چې بلوچستان د جغرافیایي پراخوالي له پلوه د پاکستان تر ټولو لوی ایالت دی او د دې ایالت امنیت ټینګول د هېواد د نورو ګڼ مېشتو سیمو په پرتله ډېر ستونزمن کار دی. د پاکستان د دفاع وزیر وویل، چې حکومت به له بلوڅ وسلهوالو سره هېڅ ډول خبرې اترې ونه کړي او د هغوی د تاوتریخوالو بریدونو پر وړاندې به په پوره ځواک ځواب ورکړي.
د بلوچستان د ازادۍ پوځ جنګیالیو د شنبې په سهار د سلواغې میاشتې په ۱۱مه، د وسلو او چاودېدونکو توکو په کارولو سره د بلوچستان په څه باندې لسو سیمو کې پر پوځي او نیمهپوځي تاسیساتو بریدونه وکړل.
پاکستان د دوشنبې په ورځ اعلان وکړ، چې د وروستیو نښتو په پایله کې ۱۴۵ تنه بلوڅ وسلوال وژل شوي دي.
