د طالبانو د اطلاعاتو او کلتور وزارت د جهادي اثارو او اسنادو د ثبت ریاست مشر سعید خوستي ویلي، د طالبانو د پیغام رسولو او رسنیز فعالیتونو چارې «ډېرې کمزورې» دي او که د «خواله رسنیو ډګر» بېپامه پرېښودل شي، نو «د دوښمن روایت پیاوړی کېږي او طالبان به ماته وخوري».
قاري سعید چې پخوا یې د حقاني شبکې د تبلیغاتو د څانګې مشري کوله، د روانې اوونۍ په پیل کې د طالبانو د مشر لهخوا د اطلاعاتو او کلتور وزارت د ریاست په یوه بست کې وټاکل شو. هغه د هغو کسانو په یوې غونډه کې چې د طالبانو په ګټه په مجازي فضا کې تبلیغاتي فعالیتونه کوي، وویل چې کله کاروونکي ټولنیزو شبکو ته ننوځي، نو په ډېرو مواردو کې لومړني محتوا چې دوی یې ویني، د طالبانو د مخالفو رسنیو پیغامونه او روایتونه وي.
د خوستي په وینا، دا پیغامونه د ورځې په اوږدو کې څو څو ځله تکرارېږي او د ځوانانو او عامو خلکو پر ذهنونو اغېز کوي. هغه وویل: «د بېلګې په توګه، لیکي چې طالبانو په افغانستان کې یو جزايي قانون یا اصولنامه توشیح کړې ده، چې په هغه کې عدالت او مساوات نشته. دا هغه لومړني شیان دي چې د ورځې په پیل کې سترګې پرې لګېږي او بیا د ورځې په اوږدو کې دا انځورونه او پیغامونه څو ځله تکرارېږي».
د خوستي اشاره د طالبانو هغې جزايي اصولنامې ته ده، چې تازه په څه باندې سلو مادو کې خپره شوې او د جرمونو د څېړلو څرنګوالی، د قضايي بهیر طریقه او د طالبانو د محکمو د سزاګانو ډولونه پهکې ټاکل شوي دي.
خوستي وویل، که چوپتیا غوره شي، «د دوښمن روایت پیاوړی کېږي» او له همدې امله طالبان باید تل په دفاعي دریځ کې پاتې نهشي، بلکې باید د رسنیو په ډګر کې د ابتکار واګې په لاس کې واخلي. نوموړي همدارنګه وویل، هغه رسنۍ چې له طالبانو سره موافقې نه دي، واړه خبرونه «غټوي» او له دې لارې د طالبانو د روایت د کمزوري کولو هڅه کوي.
خوستي دا هم وویل، چې ټولنیزې رسنۍ «د جګړې ژوندی ډګر» دی او لکه څنګه چې پوځي ډګر ته پاملرنه کېږي، هماغه اندازه دا فضا هم پاملرنې او فعال حضور ته اړتیا لري.
یاده دې وي، چې قاري سعید خوستي د الاهې دلاوري په نوم پر یوې محصلې نجلۍ د جنسي تېري په تور هم تورن دی.
هغه تر دې وړاندې د طالبانو د کورنیو چارو وزارت ویاند او وروسته د اطلاعاتو او کلتور وزارت سلاکار پاتې شوی و.
