اتحاد المجاهدین ډلې په وزیرستان کې له خلکو غوښتي چې له پوځيانو لرې وګرځي
د سویلي وزیرستان په اعظم ورسک سیمه کې اتحادالمــجاهدین وسله والې ډلې پر خلکو د شپې پاڼو له لارې غږ کړی، چې له امنیتي ځواکونو دې لرې ګرځي او خپل ماشومان دې امنیتي پوستو ته نږدې نه پرېږدي. پاڼې د یادې ډلې د څانګې جیش خــراسان له خوا خپرې شوې دي.
د دغو شپې پاڼو له مخې، یادې ډلې د سیمې اوسېدونکو ته خبرداری ورکړی چې له امنیتي ځواکونو ځانونه لرې وساتي، روغبړ ورسره ونه کړي او په ځانګړي ډول دې خپل ماشومان له امنیتي پوستو او فعالیتونو لرې وساتي.
په خبرپاڼه کې د دې خبرداري علت او د احتمالي سرغړونو پایلې نه دي روښانه شوې.
تر اوسه د پاکستان امنیتي ادارو د دې شپې پاڼو په اړه رسمي غبرګون نه دی ورکړی.
