په دېره اسماعیل خان کې وسله والو د پولیسو پر مرکز او بانک برید کړی
د خیبر پښتونخوا د دیره اسماعیل خان ولسوالۍ چارواکي وايي، چې شاوخوا یو درجن وسله والو په پاروه سیمه کې د پولیسو پر مرکز برید کړی او د نږدې بانک د څانګې لوټلو هڅه یې کړې ده.
محلي سرچینو راپور ورکړی چې وسلهوالو د شاوخوا ۴۵ دقیقو لپاره سیمه محاصره کړې وه د دواړو خواوو ترمنځ درنې ډزې شوې دي. په دې پېښه کې څلور پولیس ټپیان شوي دي.
پولیس وايي، له دې وړاندې هم په دې سیمه کې یوه بله غلا شوې وه، چې له یوه پټرول پمپ څخه دوه میلیونه روپۍ پکې لوټل شوې وې.
په ورته وخت کې د خیبر ولسوالۍ د باړې په بر قمبرخېل سیمه کې د څلورو کسانو مړي موندل شوي دي.
چارواکي وایي چې څلورواړه په ډزو وژل شوي دي.
