د اسراییل د لومړي وزیر دفتر له سټیو وېټکاف سره د بنیامین نتنیاهو د لیدنې په اړه په یوه اعلامیه کې ویلي، نتنیاهو له ایران سره د راتلونکې جمعې ورځې د مذاکراتو په تړاو ټینګار وکړ، چې تهران په وار وار ښودلې چې د باور وړ نه دی او پر خپلو ژمنو ولاړ نه پاتې کېږي.
دا په داسې حال کې ده، چې اکسیوس تېره ورځ د یوه اسراییلي چارواکي له قوله راپور ورکړ چې د سپینې ماڼۍ ځانګړی استازی سټیو وېټکاف په پام کې لري، څو د سېشنبې په ورځ د اسراییل له لومړي وزیر بنیامین نتنیاهو سره وګوري. د دغه راپور لهمخې، وېټکاف به د اسراییل د پوځ د لوی درستیز ایال زمیر سره هم وګوري.ټاکل شوې ده، چې وېټکاف به وروسته د روسیې او اوکراین ترمنځ د سولې په درې اړخیزو خبرو اترو کې د ګډون لپاره د چهارشنبې او پنجشنبې په ورځو ابوظبي ته سفر وکړي او تر هغه وروسته به له عباس عراقچي سره د خبرو لپاره ترکیې ته لاړ شي.
