د تخار ولایت د خواجه بهاوالدین، درقد او دشتقلعه ولسوالیو ترمنځ د کهنه خانې مشهور ځنګل د طالبانو د کرنې وزارت او محلي ادارو د پرېکړې له مخې وهل شوی او پر خلکو وېشل شوی دی. د سیمې خلکو دا د چاپیریال لپاره زیانناک ګام ګڼلی، خو طالبانو تراوسه په دې اړه غبرګون نه دی ښودلی.
له سیمې څخه خلکو افغانستان انټرنشنل ته وویل، چې دغه ځنګل پر۲۰ زره جریبه ځمکه ولاړ و او د طالبانو د کرنې وزارت د اداري او مالي معیین مولوي نورالدین عمیر، د تخار د کرنې ریاست د رییس او د ځمکو د ادارې د امر په امر وهل شوی او لرګي یې پر خپلو خپلوانو وېشلي دي.
د سیمې خلکو ددغه ځنګله د وهلو ویډیوګانې هم افغانستان انټرنشنل ته استولې دي.
د سیمې اوسېدونکو وویل، چې د ځنګل له وهلو وروسته د لاوډسپیکر له لارې اعلانونه وشول او خلکو ته وویل شول چې راشي او له ځنګله لرګي یوسي.
د محلي سرچینو د معلوماتو له مخې، په تېرو پنځو ورځو کې په زرګونو کسان د ځنګله د لرګیو او بوټو د انتقال لپاره دې سیمې ته تللي دي. د سیمې د خلکو په وینا، د لرګیو د انتقال لپاره له نورو ولایتونو، په ځانګړې توګه بدخشان نه هم خلک ورغلي دي.
تر اوسه د طالبانو د محلي او مرکزي ادارو له خوا د دې موضوع په اړه رسمي وضاحت نه دی ورکړل شوی، خو د چاپېریالي زیان، بېنظمۍ او اداري فساد په اړه د خلکو اندېښنې ورځ تر بلې زیاتېږي.
د سیمې خلکو نیوکه کړې، چې د ځنګله وهل پر اقلیم او چاپیریال ناوړه اغیزې کوي او تر ټولو بده لا دا، چې ددې چارې امر د طالبانو د کرنې وزارت له خوا ورکړل شوی دی.
د محلي سرچینو په وینا، د طالبانو محلي اداره غواړي چې د ځنګل ځمکه خپلو اړوندو کسانو ته په اجاره ور کړي.
د خیبر پښتونخوا چارواکو په صوابۍ کې یو پولیس افسر د پاروونکو څرګندونو او پر خپل واټساپ د طالبانو ددفاع وزیر مولوي یعقوب مجاهد د انځور لګولو، یا پروفایل کولو له امله له دندې لرې کړی دی.
د ولسوالۍ د پولیسو افسر (SHO) عبدالعلي په یو شمېر هغو ویډیوګانو کې چې خپرې شوې، ویلي و چې په ودونو کې به موسیقي منع وي او ښځې باید یوازې بازار ته لاړې نه شي او محرم ورسره وي.
د صوابۍ د ولسوالۍ پولیس افسر (DPO) عبدالعلي ته امر کړی و چې د ملا یعقوب انځور د خپل واټساپ له پروفایل نه لرې کړي، خو نوموړي د دغه امر له منلو ډډه کړې ده. سرچینې وايي، چې له دې وروسته نوموړی له خپلې دندې لرې کړای شوی دی.
پولیسو ویلي چې دا اقدام د ضابطو او قوانینو له مخې شوی دی.
د خیبر پښتونخوا والي فيصل کریم کنډي هم د عبدالعلي څرګندونې غندلې دي او د ایالت د اصولو خلاف یې بللې دي.