د ملګرو ملتونو چارواکی: په افغانستان کې د داعش فعالیتونه د سیمې او نړۍ لپاره جدي ګواښ دی
د ملګرو ملتونو لوړپوړي چارواکي الکساندر زویف د چهارشنبې په ورځ د امنیت شورا په غونډه کې خبرداری ورکړ، چې په افغانستان کې داعش خراسان څانګه لا هم د سیمې لپاره جدي ګواښ ګڼل کېږي. دا اندېښنه د طالبانو د ادارې له هغه دریځ سره په ټکر کې ده، چې وايي د داعش د ګواښ مخه یې نیولې ده.
د ترهګرۍ پر وړاندې د مبارزې په چارو کې د ملګرو ملتونو د دفتر سرپرست الکساندر زویف د چهارشنبې په ورځ د نړۍوالې سولې او امنیت پر وړاندې د ترهګریزو ګواښونو په تړاو د امنیت شورا غونډې ته وویل، چې د داعش خراسان څانګه خپلې لیکې په چټکۍ سره بیا رغوي او د انټرنټ له لارې د نویو کسانو د جذبولو وړتیا یې ساتلې ده.
نوموړي زیاته کړې: «په افغانستان کې داعش خراسان څانګه اوس د سیمې او له سیمې بهر لپاره یو له جدي ګواښونو څخه ګڼل کېږي».
د ملګرو ملتونو یاد چارواکي په کابل کې د داعش وروستي برید ته اشاره کړې، چې په ترڅ کې یې د یوه چینايي وګړي په ګډون اووه کسان ووژل شول او ګڼ نور ټپیان شول.
خو په ورته مهال بیا طالبان ادعا کوي، چې د داعش د ګواښ مخه یې نیولې ده.
