واشنګټن پوسټ ورځپاڼې اعلان کړی چې د خبرخونې او نورو څانګو په ګډون به د خپلو کارکوونکو نږدې یو پر درېیمه برخه له دندو ګوښه کړي او د سپورت څانګه به وتړي. د واشنګټن پوسټ د کارکوونکو اتحادیې ویلي دي چې له کارکوونکو پرته واشنګټن پوسټ خپل ارزښت له لاسه ورکوي.
د راپور له مخې، د ستونزو سره مخ واشنګټن پوسټ د چهارشنبې په ورځ د پراخو لګښتونو د کمښت عملي کول پیل کړل. په دغو بدلونونو کې د سپورټ څانګې تړل، بهرنیو هېوادونو ته د استول کېدونکو خبریالانو د شمېر کمول، د کتابونو څانګې بندېدل او د «Post Reports» پوډکاسټ ځنډول شامل دي. دا پرېکړې د ورځپاڼې د اجرايي مدیر مېټ مري له خوا د زوم له لارې کارکوونکو ته اعلان شوې دي.
د واشنګټن پوسټ چارواکو ویلي، دا ګامونه د ادارې د بیا تنظیم او راتلونکې ودې لپاره اخیستل شوي دي. د ورځپاڼې یوه ویاند ویلي چې دا پرېکنده بدلونونه د دې لپاره دي چې بنسټ پیاوړی شي او تمرکز یې پر هغه ځانګړي ژورنالېزم لا زیات شي چې واشنګټن پوسټ له نورو رسنیو بېلوي.
په همدې حال کې د واشنګټن پوسټ د کارکوونکو اتحادیې (ګیلډ) دا پرېکړه د اندېښنې وړ بللې او ویلي یې دي چې له کارکوونکو پرته واشنګټن پوسټ خپل ارزښت له لاسه ورکوي.
دا بدلونونه په داسې مهال رامنځته کیږي چې ورځپاڼه د ګډونوالو د کمښت او د مالک جېف بېزوس د ځینو پرېکړو له امله له سختو ننګونو سره مخ ده، په داسې حال کې چې د واشنګټن پوسټ سیالې ورځپاڼې نیویارک ټایمز په وروستیو کلونو کې د پام وړ وده کړې ده.
