په افغانستان کې د ملګرو ملتونو علمي، فرهنګي او ښوونیز سازمان (یونسکو) وایي، د ۲۰۲۵کال د اګست میاشتې په زلزله کې د کونړ او ننګرهار ولایتونو ښوونځي زیانمن شوي او د ارزونو له مخې ۲۳ سلنه ودانۍ بېړنۍ رغونې ته اړتیا لري.
دغه ادارې پر اېکس پاڼه لیکلي، د یونسکو افغانستان دفتر د ساینس اضطراري صندوق په ملاتړ او د جاپان په مرسته په ۲۶ښوونځیو کې ۸۲ ودانۍ ارزول شوې. راپور ښيي، چې ۷۷ سلنه ودانۍ خوندي پاتې دي؛ خو پاتې ۲۳ سلنه ودانۍ بېړنۍ بیارغونې ته اړتیا لري، څو زدهکوونکي په خوندي چاپېریال کې زدهکړو ته دوام ورکړي.
د یونسکو ادارې ویلي: «د زلزلې له امله د ښوونځیو زیان ارزول د زدهکوونکو د خوندیتوب او ښوونیزو فعالیتونو د دوام لپاره لومړنی او حیاتي ګام دی». خبرپاڼه ټینګار کوي، چې د بېړنیو بیارغونو او رغونې ملاتړ نه یوازې د زدهکوونکو خوندیتوب تضمینوي؛ بلکې د ټولنې ثبات او د ښوونځي چاپېریال د ښهوالي لپاره هم مهم دی.
یونسکو په افغانستان کې د ښوونځیو د بیارغونې او د زدهکړې د دوام لپاره له نړۍوالو شریکانو د همکارۍ غوښتنه کړې ده.
