سعودي عربستان او ترکیې په ریاض کې د رجب طیب اردوغان د سفر پرمهال په اقتصادي او امنیتي برخه کې د ستراتیژیکو اړیکو پر پراخولو ټینګار کړی او ویلي یې دي، چې دغو اړیکو په سایبر امنیت او ترهګرۍ او افراطیت ضد مبارزه کې پرمختګ کړی.
د دواړو هېوادونو په ګډه اعلامیه کې راغلي چې د غیر تېلي سوداګرۍ زیاتوالی، د ګډو پانګونو هڅول او د ترکیې او خلیج د همکاریو شورا د هېوادونو ترمنځ د ازاد تجارت په اړه خبرې د دواړو هېوادونو لومړیتوبونه دي.
د خبرو پر مهال دواړو لوریو د خپلو دوه اړخیزو اړیکو ژورتیا او تاریخي بنسټونه یاد کړي، چې د اعلامیې له مخې، د ګډو فرهنګي، تاریخي او ورورګلویزو اړیکو پر بنسټ ولاړ دي.
دواړو هېوادونو د پیاوړو سوداګریزواړیکو ستاینه کړې او ژمنه یې کړې چې په لومړیتوب لرونکو برخو کې همکاري پراخه کړي او د سعودي ویژن ۲۰۳۰ او ترکیې د پېړۍ ویژن فرصتونه لوړ کړي.
اعلامیه وايي، چې دواړو خواوو د تېلو، پترو کیمیاوي موادو، برېښنا او نوې انرژۍ په برخو کې د ګډې همکارۍ ژمنه کړې ده.
د دواړو خواوو مشرانو ویلي، چې د ریاض او انقرې ترمنځ دفاعي او امنیتي اړیکې لا پیاوړې شوې، په ځانګړې توګه د سایبر امنیت، ترهګرۍ او افراطیت ضد مبارزه کې یې پرمختګ کړی دی.
