پاکستان د سیپېک له لارو له منځنۍ اسیا سره د خپلو بندرونو د نښلونې هڅې چټکې کړې
چین او پاکستان د څلور اړخیز ټرانزیټي ترانسپورټ تړون (QTTA) د پلي کېدو او پراختیا په موخه ګډه ناسته کړې. د افغانستان لپاره د پاکستان پخوانی ځانګړی استازی محمد صادق وايي، دغه تړون د چین او د سیپک له لارې د پاکستان سمندري بندرونه له منځنۍ اسیا سره نښلوي.
د افغانستان لپاره د پاکستان پخواني ځانګړي استازي محمد صادق پر خپل اېکس لیکلي، چې د چینايي او پاکستاني چارواکو په دې ناسته کې ویل شوي، چې په وروستیو میاشتو کې له دې مسیره د ټرانزیټي ترافیک کچه پام وړ لوړه شوې ده.
نوموړي ویلي، چې د یاد مسیر له لارې ترانزیټي ترافیک له څو کلونو راهیسې روان و.
د صادق په وینا، د چینايي او پاکستاني چارواکو په ناسته کې ټینګار شوی، چې د ځینو تخنیکي او اداري سمونونو په عملي کېدو سره به دا مسیر لا اغیزناک شي.
پاکستاني چارواکي، دا مهال پر اړینو تعدیلاتو کار روان دی او له بشپړېدو وروسته به دغه دهلېز د منځنۍ اسیا هېوادونو لپاره د پاکستان له سمندري بندرونو سره د وصل تر ټولو چټکه او اغیزناکه ترانزیټي لاره وګرځي.
