روسي کامیډین ته یوه ټوکه د ۶ کاله زندان په بیه پرېوته
یو روسی کامیډین ارټمي اوستانین د چارشنبې په ورځ له دې امله په پنځه کاله او نهه میاشتې زندان او ۳۰۰ زره روبله جریمې محکوم شوی، چې په خپله ټوکه کې یې یو پخوانی معیوب سرتېری یاد کړی یا انځور کړی و. هغه په کرکې پارونې او د عیسویانو احساساتو ته په سپکاوي تورن شوی.
اوستانین د تېر کال په مارچ میاشت کې د یوې کوچنۍ نندارې پرمهال ټوکه کې یو داسې سرتېری انځور کړی و چې د ماین چاودنې له امله یې پښې له لاسه ورکړې وي او اوس په سکیټ بورډ حرکت کوي او دده په پښو ور لویږي.
د ویډیو له خپریدو وروسته پوځي بلاګرانو دا ټوکه د سرتېرو سپکاوی وباله.
اوستانین هڅه کړې وه چې روسیه پرېږدي، خو په بیلاروس کې ونیول شو او بیا مسکو ته ولېږدول شو.
