د طالبانو د کورنیو چارو وزارت خبر ورکړی، چې په کابل کې یې د تېرو ورځو عملیاتو پر مهال ۶۶ کسان د نشهيي توکو د قاچاق او پلور په تړاو نیولي دي. دغه وزارت زیاته کړې، چې نیول شوي کسان به تر لومړنیو پلټنو وروسته عدلي او قضايي ادارو ته ور وپېژندل شي.
یاد وزارت د چهارشنبې په ورځ (د سلواغې ۱۵مه) په یوې خبرپاڼه کې ویلي، چې د نیول شویو کسانو سره یې ۲زره او ۹۴ نشهيي ټابلېټونه، ۱۸ لېټره الکولي مشروبات، کرېسټال او چرس نیولي دي.
د طالبانو تر واک لاندې د پېښو سره د مبارزې د چمتووالي ملي ادارې له سولیډرتي انټرنېشنل (SI) او هنډیکپ انټرنېشنل (HI) بنسټونو سره د څه باندې ۷۲۲زره ډالرو په ارزښت د ګډو همکاریو درې اړخیزه هوکړه لاسلیک کړه.
د یادې هوکړې موخه د طبیعي پېښو د ګواښونو کمول، د ټولنې پیاوړتیا او د معلولیت لرونکو کسانو ملاتړ ښودل شوی دی. د یادې ادارې د خبرپاڼې له مخې؛ د دغه ادارې رییس ملا نورالدین ترابي د دواړو بنسټونو له استازو سره د لیدنې پر مهال ټینګار کړی، چې دغه پروژه باید ژر، په بشپړې روڼتیا او د خلکو د اړتیاوو له مخې پلې شي.
ترابي ویلي: «همکار بنسټونه باید خپلې پروژې پر وخت عملي کړي او د هرې طبیعي پېښې پرمهال بې له ځنډه له موږ سره په همغږۍ زیانمنو سیمو ته ورسېږي». د خبرپاڼې له مخې؛ د سولیډرتي انټرنېشنل بنسټ به د بامیان ولایت د یکاولنګ ولسوالۍ په بېلابېلو کلیو کې له اقلیم سره سمون لرونکي ۳زره نیالګي کېنوي، اړمنو کورنیو ته به د ځنګلي واښو او سبزیجاتو تخمونه ووېشي او د طبیعي پېښو د مخنیوي لپاره به وقایوي پروژې پلې کړي.
همداراز هنډیکپ انټرنېشنل بنسټ به په همدې ولسوالۍ کې د معلولیت لرونکو کسانو ارزونه وکړي، هغوی ته به د پېښو د ګواښونو په اړه عامه پوهاوی ورکړي، لازم وسایل به ورته برابر کړي او د کورنیو د ملاتړ لپاره به ځانګړي مشورتي پروګرامونه عملي کړي.
د طالبانو د پېښو سره د مبارزې د چمتووالي ملي اداره وایي، یوازې په تېر کال کې د ماینونو او ناچاوده توکو د چاودنې ۱۹۳ پېښې ثبت شوې چې له امله یې ۸۷ کسان وژل شوي او ۳۳۳ نور ټپیان شوي دي.
یادې ادارې ویلي، چې د ماین پاکۍ د انسجام او همغږۍ ریاست او همکارو بنسټونو په همکارۍ یې په تېرو ۱۲ میاشتو کې ۵۸ کیلومتره په ماینونو ککړې سیمې پاکې کړې دي. د یادې ادارې ویاند حافظ محمد یوسف حماد ویلي: «موږ په تېر یو کال کې ۲۴زره او ۷۲۰ بېلابېل ډوله ماینونه کشف او خنثا کړي دي، چې دا د خلکو د ژوند ژغورلو په برخه کې مهم ګام دی».
حماد ټینګار کړی، چې د دغه پېښو له قربانیانو شاوخوا ۶۷،۵ سلنه یې ماشومان دي. د طالبانو د پېښو پر وړاندې د مبارزې ملي ادارې همداراز ویلي، چې دا مهال په ټول هېواد کې ۱۵۵ د ماین پاکۍ ټیمونه فعالیت کوي او تر دې دمه یې څه باندې دوه مېلیونه وګړو ته د ماینونو د ګواښونو په اړه عامه پوهاوی ورکړی دی.
نوموړي زیاته کړه، لاهم په افغانستان کې شاوخوا یو لک او شپږ کیلومتره مربع ځمکه په ماینونو او ناچاودو توکو ککړه ده او هڅې روانې دي چې دغه ګواښ په بشپړه توګه لهمنځه یووړل شي.
افغانستان د نړۍ له هغو هېوادونو شمېرل کېږي، چې د جګړو له اوږدې مودې وروسته هم په پراخو سیمو کې د ماینونو او ناچاوده توکو له ګواښ سره مخ دی.
د HALO Trust چې اصلي کار یې په جګړه ځپلو هېوادونو کې د ځمکنیو ماینونو او ناچاوده توکو پاکول دي وایي، په افغانستان کې د خوړو د تولید، ښوونې، ځمکو د کرکېلې او د خلکو د ورځني ژوند د بیا پیل لپاره لا هم زرګونه ساحې په ماینونو ککړې دي؛ پهداسې حال کې چې له ۱۹۸۸ کال راهیسې په مېلیونونه ماینونه او ناچاوده توکي شنډ شوي دي.
په کندهار ښار کې نن سهار ناپېژاندو کسانو د تېر جمهوري نظام پر مهال د اجراییه ریاست پر سلاکار طوفان وزیري برید کړی، چې له امله یې نوموړی سخت ټپي شوی دی. سرچینې وايي، ناپېژاندو کسانو نوموړی سخت وهلی او وروسته له سیمې تښتېدلی دي.
د طوفان وزیري نږدې خپلوان وايي، چې پېښه نن سهار شاوخوا لس بجې د کندهار ښار د ۱۵مې ناحیې اړوند د یخ کارېز په سیمه کې رامنځته شوې. د هغه نږدې کسانو د نوموړي روغتیايي وضعیت ناسم ښودلی او وایي دا مهال د کندهار د عینو مېنې په روغتون کې تر درملنې لاندې دی.
برید کوونکي له سیمې تښتېدلي او د برید انګېزه لا هم روښانه نهده؛ خو خپله طوفان وزيري په یوه ویډيو کې په ټپي حالت کې وایي، چې بريد کوونکي د پاکستان استخباراتي ادارې سره لاس لري: «د امارت مشره دغه کسان د شمالي وزیرستان د کمپ سره اړیکې لري، دا د ایاېسای خاص سړي دي، په شپږو کسانو یې ووهلم».
تر دې دمه سیمهییزو طالب چارواکو د پېښې په اړه څه نهدي ویلي. طوفان وزیري د مخکېني جمهوري نظام پر مهال د اجراییه رییس ډاکټر عبدالله عبدالله سلاکار پاتې شوی و. هغه د طالبانو له بیا واکمنېدو وروسته له هېواده وتلی و؛ خو په دې وروستیو کې د طالبانو د اړیکو کمېسیون له لارې بېرته افغانستان ته ستون شوی و.
د طالبانو تر واک لاندې د هواپوهنې ادارې د پنجشنې او جمعې په ورځو د افغانستان په ۲۷ ولایتونو کې د بارانونو او سېلابونو راوتو اټکل کړی دی. دغه ادارې د سیندونو پر غاړه مېشتو اوسېدونکو ته خبرداری ورکړی، چې د سېندونو په غاړه له هر ډول تګراتګ ډډه وکړي.
د طالبانو یادې ادارې د چهارشنبې په ورځ (د سلواغې ۱۵مه) ویلي، چې د هېواد د سیندیزو حوزو په ځينو برخو کې د اوبو د کچې لوړوالي او د سېلابونو راوتلو اټکل شوی.
د دوی په خبره؛ د ورښتونو له امله د سېلابونو او د اوبو د کچې لوړوالي وړاندوینه هرات، غور، بادغیس، فراه، نیمروز، هلمند، کندهار، روزګان، جوزجان، سرپل، فاریاب، بلخ، سمنګان، بغلان، غزنی، لوګر، میدان وردګ، کابل، پنجشېر، کاپیسا، پروان، پکتیکا، پکتیا، خوست، لغمان، کونړ او نورستان ولایتونو لپاره شوې ده.
طالبانو د یادو سیمو اوسېدونکو ته سپارښتنه کړې، چې د ځانونو او ماشومانو د خوندیتوب لپاره د سېندونو پر غاړه له تګراتګ ډډه وکړي.
د روسیې ټرانسپورټ وزارت ویلي، چې اوسمهال د اریانا افغان هوایي شرکت یوازینی شرکت دی چې د روسیې او افغانستان ترمنځ الوتنې ترسره کوي. د مسکو چارواکو ویلي، چې دامهال د دواړه هېوادونو څخه بل هیڅ شرکت د الوتنو لپاره غوښتنه نهده کړې.
ریانووستی ورځپاڼې د سېشنبې په ورځ (د سلواغې ۱۴مه) د روسیې د ټرانسپورټ وزارت چارواکو له حوالې راپور ورکړی، چې نه د افغانستان هوایي شرکتونو روسیې ته او نه د روسیې هوایي شرکتونو افغانستان ته د الوتنو لېوالتیا ښودلې.
اوسمهال د دواړو هېوادونو ترمنځ یوازي د اریانا افغان هوایي شرکت په اونۍ کې یو ځل الوتنه لري.
تر دې وړاندې په مسکو کې د طالبانو سفیر د روسیې ټاس دولتي خبري اژانس سره په مرکه کې ویلي و، د روسیې او طالبانو ترمنځ د سوداګرۍ او ګرځندوی اړیکې مخ په پراخېدو دي او دواړه اړخونه هڅه کوي چې په دې برخو کې خپله همکاري لاپراخه کړي.