په ملګرو ملتونو کې د امریکا سفیر مایک والټز د چهارشنبې په ورځ د امنیت شورا په ناسته کې وویل، چې په افغانستان کې د داعش ګواښ په دوامداره توګه شتون لري او د مبارزې لپاره یې ګډې او همغږې نړۍوالې مبارزې ته اړتیا ده.
والټز وویل، چې د داعش ګواښ یوازې په افغانستان پورې محدود نه دی، بلکې په نورو سیمو لکه افریقا، منځني ختیځ او سوېلي اسیا کې هم د پراخېدو په حال کې دی.
هغه زیاته کړه: «په افریقا باندې د داعش تمرکز، په سوریه او عراق کې د دې ډلې د هستو د فعالیتونو دوام او په افغانستان کې د داعش خراسان دوامداره ګواښ په ښکاره توګه د ترهګرۍ ضد د مستمرو او همغږو هڅو اړتیا ښيي».
د امریکا استازي همدارنګه یادونه وکړه، چې ترهګرې ډلې د خپلو فعالیتونو د پراخولو لپاره له نویو او ډیجیټلي ټېکنالوژیو څخه ګټه پورته کوي.
نوموړی دغه څرګندونې په داسې حال کې کوي، چې پر افغانستان د طالبانو له بیا واکمنېدو وروسته که څه هم دغې ډلې د داعش پر ضد یو لړ عملیات کړي او د دوی یو شمېر لوړپوړي مشران یې هم ور وژلي، خو د ناورین نړۍوال سازمان بیا په خپل یوه راپور کې ویلي، چې داعش خراسان ډله اوس هم د دې هېواد دننه او بهر کې د «خونړیو بریدونو» د ترسره کولو ظرفیت لري.
په راپور کې دا هم ویل شوي، چې داعش خراسان ډله اوس هڅه کوي ځان د یوازینۍ نړۍوالې جهادي ډلې په توګه معرفي کړي، چې له افغانستانه خپل فعالیتونه پرمخ وړي.
د ناورین نړۍوال سازمان وایي، چې د داعش خراسان ډلې بریدونه یوازې د افغانستان پورې محدود نه دي پاتې شوي، بلکې دا ډله اوس له سیمې بهر هم خونړي بریدونه تنظیموي؛ په ځانګړي ډول هغه بریدونه چې په مسکو، ایران، ترکیه او ان اروپايي هېوادونو کې شوي.
