د ایران د بشري حقونو سازمان خبرداری: سلګونه نیول شوي معترضین د اعدام له حکم سره مخ دي
د ایران د بشري حقونو سازمان په سراسري اعتراضونو کې د ۴۰ زره کسانو نیول کېدو ته په اشارې سره لیکلي، چې ډېری نیول شوي کسان له بهر سره د هر ډول اړیکو د پرې کېدو په حالت او مطلق بېخبرۍ کې دي.
دغه سازمان خبرداری ورکړی، چې له یاد شمېر څخه سلګونه کسان د اعدام له حکم او هغو تورونو سره مخ دي چې پایله یې د اعدام سزا ده.
د دغه سازمان په راپور کې چې د چهارشنبې په ورځ (د سلواغې ۱۵مه) خپور شوی، راغلي چې نیول شوي کسان په توقیف ځایونو، زندانونو او د سپاه پاسداران او استخباراتو وزارت په غېر رسمي یا پټو مرکزونو کې ساتل کېږي چې ډېری یې خپلو کورنیو یا مدافع وکیلانو ته لاسرسی نه لري او په بشپړه توګه له هر ډول اغېزمن قضایي څار څخه بهر دي.
د بشري حقونو سازمان د اسلامي جمهوري نظام د جګپوړو چارواکو په ځانګړې توګه د قضایه قوې د مشر هغو لارښوونو ته په اشارې سره چې د «بېړنیو محکمو» د جوړولو او «سختو سزاګانو» د ورکولو په اړه یې کړې دي، زیاته کړې چې اعتراض کوونکي په سیستماتیک ډول د «ترهګرو»، «بهرنیو اجنټانو» او «محاربانو» په څېر نومونو سره معرفي شوي؛ دا هغه تورونه دي، چې د اسلامي جمهوریت د قوانینو لهمخې د اعدام د حکم د صادرېدو لامل کېدای شي.
دغه سازمان همدا راز لیکلي، چې ګڼ شمېر داسې راپورونه یې ترلاسه کړي چې ښيي «ځینې ټپي شوي اعتراض کوونکي په توقیف ځایونو کې په ډزو وژل شوي یا هم په قصدي ډول له روغتیایي خدماتو بېبرخې شوي، چې له امله یې خپل ژوند له لاسه ورکړی دی».
د بشري حقونو دغه سازمان په دوام کې هغو باوري خو تر اوسه نا تایید شویو راپورونو ته په اشارې سره زیاته کړې، چې یو شمېر نیول شوي کسان په څو زندانونو کې په پټه اعدام شوي دي.
دغه سازمان اشاره وکړه، چې دا راپورونه تر څېړنې لاندې دي او خبرداری یې ورکړ: «د وژلو په ښکاره نیت د اسلامي جمهوریت لهخوا د مرګونې ځواک پراخې او سیستماتیکې کارونې ته په کتو په ځانګړې توګه د انټرنټ له سراسري پرې کېدو وروسته او د شکنجې لاندې د جبري اعترافونو پر بنسټ د اعدام حکمونو صادرولو اوږده مخینه، عادلانه محاکمې ته بشپړ بېغوري او د بېړنیو او پټو اعدامونو تاریخچه؛ نیول شوي کسان دا مهال د اعدام حکمونو د صادرېدو، د اعدام د اجرا او له قضايي پړاوونو پرته د وژنو له مخ په زیاتېدونکي ګواښ سره مخ دي.»
دا راپور ټینګار کوي، چې له اعتراضونو سره د تړاو په تور د نیول شویو کسانو وضعیت «یو بېړنی حالت دی او د نړۍوالې ټولنې سمدستي پاملرنې او اقدام ته اړتیا لري».
د ایران د بشري حقونو د سازمان مدیر محمود امیريمقدم په دې اړه وویل: «اسلامي جمهوریت هڅه کوي چې د وېرې او وحشت د واکمنۍ په رامنځته کولو سره د اعتراضونو د نویو څپو د جوړېدو مخه ونیسي او د یوه بېثباته او لړزاند نظام بقا ته دوام ورکړي».
امیريمقدم له نړۍوالې ټولنې وغوښتل، چې د نیول شویو اعتراض کوونکو د ژوند ساتنې لپاره د خپل مسوولیت او اخلاقي دندې پر بنسټ سمدستي اقدام وکړي.
