د ملګرو ملتونو امنیت شورا په بلوچستان کې وسلهوال مرګوني بریدونه وغندل
د ملګرو ملتونو امنیت شورا د پاکستان په بلوچستان ایالت کې وروستي بریدونه غندلي دي. دغې شورا په یوې اعلامیې کې ټینګار کړی، چې ترهګري په ټولو بڼو او ډولونو د نړۍوالې سولې او امنیت پر وړاندې له تر ټولو جدي ګواښونو څخه ده.
په هغه اعلامیه کې چې د سېشنبې په ورځ خپره شوې راغلي، چې د امنیت شورا غړو د دغه ناوړو ترهګریزو کړنو د عاملانو، تنظیموونکو، مالي تمویلونکو او ملاتړو د ځوابویلو او عدالت ته د راکاږلو پر اړتیا ټینګار کړی.
د ملګرو ملتونو امنیت شورا غړو له ټولو هېوادونو غوښتي، چې د نړۍوالو قوانینو او د امنیت شورا د اړونده پرېکړهلیکونو له مخې په دې برخه کې د پاکستان له حکومت سره فعاله همکاري وکړي.
امنیت شورا دارنګه له هېوادونو غوښتنه کړې، چې د نړۍوالو قوانینو له مخې خپلو ژمنو ته په پام، د ترهګریزو کړنو له امله د نړۍوالې سولې او امنیت پر وړاندې رامنځته کېدونکو ګواښونو پر ضد مبارزه وکړي.
د بلوچستان «بیلتونپاله» وسلوالو د شنبې په سهار (د سلواغې ۱۱مه) د پاکستان د بلوچستان ایالت په بېلابېلو سیمو کې بریدونه وکړل.
