د طالبانو د معیار او کیفیت ادارې مشر ملا فیضالله تمیم په کابل کې ښار کې د درملو له ۳ تولیدو فابریکو څخه لیدنه کړې او د هغوی د تولید بهیر یې له نږدې ارزولی دی. دا اداره ټینګار کوي، چې په افغانستان کې شته کارخونې باید معیاري درمل تولید کړي.
د طالبانو د یادې ادارې مشر تر څنګ د دغه ډلې د عامې روغتیا وزارت او د اطلاعاتو او کلتور وزارت هم د دې څارنې په پلاوي کې ګډون درلود. خبرپاڼه کې راغلي، په یادو کارخونو کې د معیارونو پلي کېدو وضعیت، د تولید تګلارې او د محصولاتو د کیفیت ارزونه شوې ده.
خبرپاڼه زیاتوي چې د طالبانو یاد پلاوي د دغو کارخونو څخه د لیدنو پر مهال د هغوی ستونزې او پر وړاندې یې پرتې ننګوونې هم اورېدلې دي. د طالبانو د ریاست الوزرا اداري مرستیال عبدالغني برادر څلور میاشتې وړاندې په افغانستان کې د درملو واردوونکو شرکتونو ته سپارښتنه کړې وه چې له پاکستان څخه واردات بند کړي او په نورو بدیلو لارو دې غور وکړي.
د یادونې ده، چې ملا برادر پاکستاني درمل بې کیفیته وبلل او همداراز د طالبانو د عامې روغتیا وزارت غړي هم په بېلابېلو ولایتونو کې پر درملتونونو ګرځي او بې کیفیته پاکستاني درمل راټولوي. افغانستان کې که څه هم د درملو جوړولو ځینې فابریکې شته؛ خو دا هېواد لا هم په دې برخه کې پر وارداتو تکیه دی او په کور دننه تولیدات د افغانانو اړتیاوې نهشي پوره کولای.
