د درنې واورې له امله؛ د پښتونخوا تیرا دره کې تر ۱۰زره ډېر کسان په خپلو کلیو کې بندپاتې دي
د خیبر پښتونخوا په تیرا دره کې شاوخوا ۱۰زره او ۴۰۰ د بار قمبرخېل قوم اوسېدونکي له تېرې نږدې یوې میاشتې راهیسې په خپلو کلیو کې بند پاتې دي. د پاکستان ډان ورځپاڼې راپور ورکړی، چې د درنې واورې له امله د یادې سیمې د تګراتګ ټولې لارې تړل شوې دي.
په راپور کې راغلي، چې د حیدر کنډو پاس لاره د واورې له امله تړل شوې او د کورمې ولسوالۍ پر لور بله لاره هم د پاکستان امنیتي ځواکونو لهخوا د کېندل شویو لویو کندو له کبله تړل شوې ده. له همدې امله شاوخوا ۱۴۰۰ کورنۍ په تیرا دره کې د مرستې په تمه دي.
د راپور له مخې؛ بندپاتې ځايي اوسېدونکي د خوړو او درملو له سخت کمښت شکایت کوي او ویلي یې دي، چې د لارو بندېدو خلک له جدي ستونزو سره مخ کړي او د ناروغانو، ماشومانو او مشرانو لپاره درمل نهشته.
په همدې حال کې د خیبر ولسوالۍ ځایي ادارې هم اعلان کړی، چې د کشمیر ورځې له امله به د پنجشنبې په ورځ د کډوالو د نوملیکنې ټول مرکزونه هم تړلي وي. له تېرو څو ورځو راهیسې د تیرا درې بېځایه شوې کورنۍ د یادې ولسوالۍ دغه مرکزونو ته د نوملیکنې لپاره تلل.
