د ایران د استخباراتو وزیر: هغه هېوادونه به د دې کار بیه پرې کړي چې سپاه ترهګره ډله بولي
د ایران د استخباراتو وزیر اسماعیل خطیب وايي، «سپاه پاسداران په نړۍ کې د ترهګرۍ ضد تر ټولو ستره او ځواکمنه مبارزه کوونکې اداره ده».
نوموړي ټينګار وکړ، هغه هېوادونه چې د ايران د اسلامي نظام پر ضد داسې ګامونه اخلي او سپاه پاسداران ترهګره ډله اعلانوي، بايد د خپلو کړنو ځواب ورکړي او د دې پرېکړې بيه به خامخا پرې کړي. د استخباراتو وزير زياته کړه: «د اسلامي انقلاب زاړه او کينهلرونکي دوښمنان چې سپاه پاسداران يې ترهګر بللی، په خپله د ترهګرو پناهځايونه دي او له ترهګرۍ ملاتړ کوي».
هغه وويل، سپاه پاسداران د سيمې او نړۍ په کچه د ترهګرۍ پر وړاندې مهم او اغېزمن رول لوبولی او د امنيت د ټينګښت لپاره يې پراخې قربانۍ ورکړې دي.
