د بریتانیا لومړي وزیر د اپسټین د قضیې له قربانیانو بښنه غوښتې
د اپسټین قضیې په اړه د اسنادو له خپرېدو وروسته، په امریکا کې د بریټانیا د سفیر پیټر منډلسن او اپسټین تر منځ د اړیکو جزئیات هم ښکاره شول. اوس له همدې امله د بریټانیا لومړي وزیر کیېر سټارمر د جېفري اپسټین د قیضي له قربانیانو بښنه غوښتې ده.
سټارمر ویلي، چې د امریکا لپاره د سفیر په توګه د منډلسن د ټاکنې پر مهال یې د هغه «درواغ» منلي وو او د دغو اړیکو له ژورو او تیارو اړخونو خبر نه و. نوموړي دا څرګندونې نن د پنجشنبې په ورځ د سلواغې په ۱۶مه نېټه د انګلستان په جنوب کې وکړې.
د امریکا د عدلیې وزارت شاوخوا ۳.۵میلیونه اسناد خپاره کړي، چې د اپسټین د جنسي جرمونو قضیې سره تړاو لري او پکې د سفیر منډلسن اړیکې هم څرګندې شوې دي.
