طالبان وايي په بلخ کې یې یوه ښځه د «نامشروع» اړیکو په تور په دُرو وهلې ده
طالبان وایي، چې د بلخ ولایت په زارې ولسوالۍ کې یې یوه ښځه د «نامشروع» اړیکو په تور په عام محضر کې ۳۵ دُرې وهلې ده.
د طالبانو سترې محکمې د پنجشنبې په ورځ (د سلواغې ۱۶مه د یوې خبرپاڼې په خپرولو سره ویلي، چې یادې ښځې ته یې د سزا ورکولو پر مهال عامو خلکو ته هم د پند اخیستو په موخه د نندارې بلنه ورکړې وه.
دا په داسې حال کې ده، چې طالبانو په تېرو درېیو ورځو کې په بېلابېلو ولایتونو کې څه باندې څلویښت کسان په دُرو وهلي دي.
سره له دې چې د طالبانو لهخوا د عامو خلکو پروړاندې د بدني سزاګانو د ورکولو پر موضوع د بشري حقونو ګڼو سازمانونو سخت غبرګونونه ښودلي دي، خو لا هم طالبان نږدې هره ورځ د هېواد په بېلابېلو ولایتونو کې خلکو ته په عام محضر کې بدني سزاګانې ورکوي.
