رحمانالله ګربز سږ کال په پياېساېل کې د پېښور زلمي لوبډلې په ملاتړ لوبېږي
د پېښور زلمي لوبډلې بنسټګر جاوېد اپریدی وايي، چې افغان کرکټر رحمانالله ګربز به سږ کال د پاکستان سوپر لیګ (پياېساېل) په سیالیو کې د پېښور زلمي لوبډلې لپاره ولوبېږي.
اپریدي د نوموړي هرکلی کړی او پر ایکس خواله رسنۍ یې په یوه پیغام کې ویلي: «موږ په ډیر ویاړ سره رحمانالله ګربز ته د پېښور زلمي کورنۍ سره د یو ځای کېدو لپاره هرکلی وایو. هیله ده چې د هغه راتګ به زموږ لپاره ویاړ راوړي او په لوبغالي کې به ښه وځلېږي.»
رحمانالله ګربز د افغانستان د ملي لوبډلې له تکړه او پیاوړو توپوهونکو ګڼل کېږي، چې تر دې وړاندې یې په بېلابېلو نړیوالو لیګونو کې پام وړ لاسته راوړنې او لوبې کړې دي.
