په بلخ کې د طالبانو د روغتیا ریاست ویاند کمال خان ځدراڼ وایي، د روان کال په تېرو لسو میاشتو کې په بلخ حوزوي روغتون کې تر ۲۱ زره ډېر ماشومان زېږېدلي چې له دې ډلې شاوخوا ۶۰۰ ماشومان له وخته مخکې زېږېدلي او ۴۲۰ ماشومان د زېږون تر مخه مړه شوي دي.
د دغه روغتون ډاکتران د مور او ماشوم د مړینې اصلي لاملونه لوړ فشار، د پښتورګو ناروغي، ناسمه تغذیه او د مېندو نامناسب عمر یادوي. د دوی په وینا؛ د مېندوارۍ پرمهال د روغتیایي څار نشتوالی هم د دغه ستونزو په زیاتېدو کې رول لري.
د بلخ حوزوي روغتون دا مهال د شمال زون په کچه یو مهم روغتیايي مرکز دی، چې د بېلابېلو ولایتونو ناروغانو ته خدمتونه وړاندې کوي. تر دې مخکې په بلخ کې د طالبانو د عامې روغتیا ریاست ویلي و، چې د تېر یو کال په موده کې د ابوعلي سینا حوزوي او تدريسي روغتون له لوري ۴۳زره او ۷۷۶ وړیا جراحي عملیاتونه ترسره شوي دي.
