د طالبانو د اطلاعاتو او فرهنګ وزارت ویاند خبیب غفران ویلي، چې روسیې د کازان ښار د اقتصادي، فرهنګي او ګرځندوی فورم لپاره د طالبانو د اطلاعاتو او فرهنګ وزیر شېراحمد حقاني ته د ګډون رسمي بلنه ورکړې ده.
هغه زیاته کړې، چې په مسکو کې د افغانستان د اطلاعاتو او فرهنګ وزارت فرهنګي اتشې فضلالهادي حمزه د روسیې فدراسیون د کلتور وزارت له یو شمېر چارواکو سره لیدلي دي. د هغه په وینا؛ د یادې لیدنې پر مهال د روسیې د کلتور وزارت د هنرونو او ولسي نوښتونو د ملاتړ څانګې مرستیال د کازان ښار د اقتصادي، فرهنګي او ګرځندوی فورم لپاره د طالبانو د اطلاعاتو او فرهنګ وزیر ته رسمي بلنه ورکړې.
هغه ویلي، په دغه ناسته کې روسي لوري د دواړو خواوو ترمنځ د همکاریو پر پراختیا ټینګار کړی او افغانستان ته یې د خپل لوړپوړي پلاوي د سفر لېوالتیا هم څرګنده کړې ده.
د امریکا سوفان څېړنیز مرکز په یوه نوي تحلیل کې خبرداری ورکړی، چې په ۲۰۲۱کال کې له افغانستان نه په بیړه د امریکايي ځواکونو تر وتلو ورورسته دغه هېواد د لوېدیځ لپاره په یوه «ستراتېژیک ړوند ځای» بدل شوی دی.
دغه تحلیل چې د پنجشنبې په ورځ (د سلواغې ۱۶مه) خپور شوی پهکې راغلي، چې په افغانستان کې د معلوماتو نشتوالی، د ترهګرو ډولو فعالیتونه او د طالبانو ډیپلوماټیک تحرکات د سیمې د امنیتي راتلونکي اړوند یو پېچلی انځور وړاندې کوي.
د یاد مرکز په تحلیلي راپور کې راغلي، واک ته د طالبانو له رسېدو را وروسته یو ځل بیا افغانستان په یوې داسې سیمې بدل شوی چې لوېديځ سیاستوال ورته پاملرنه نهکوي.
راپور ټینګار کوي، چې په افغانستان کې د امریکا د حضور نشتوالی د ترهګرو ډلو د وضعیت کره ارزونه سخته کړې او افغانستان یې د لوېدیځو امنیتي ادارو لپاره په یوه «ړوند ځای» بدل کړی دی.
د یادې شننې له مخې؛ طالبان په وروستیو کلونو کې توانېدلي، چې د افغانستان پر ډېرو سیمو خپل کنټرول ټینګ کړي.
د ملګرو ملتونو د څار ډلې راپور هم ښيي، چې طالبانو د داعش د پراختیا په مهار کې د پام وړ بریا لرلې ده او دغه ډله یې تر ډېره د افغانستان شمالي او ختیځو سیمو ته محدوده کړې ده؛ چېرته چې یې جنګیالي د وړو، وړو ډلو په بڼه فعالیت کوي.
د امریکا د معلوماتي تشې ستونزه او د القاعده د وضعیت په اړه ابهام
سوفان مرکز لیکي، چې په افغانستان کې د امریکا د پوځي حضور نشتوالي د استخباراتي معلوماتو او په ځانګړي ډول د انساني معلوماتو راټولول محدود کړي دي. له همدې امله په افغانستان کې د القاعده د پیاوړتیا یا کمزورۍ په اړه کره ارزونه ګرانه شوې ده.
د یادې ډلې د جنګیالیو د شمېر په اړه اټکلونه له لسګونو څخه تر څو سوه کسانو پورې توپیر لري او داسې راپورونه هم شته، چې القاعده لږ تر لږه په ۱۲ ولایتونو کې فعالیت لري. په راپور کې راغلي، چې ان د امریکا د پراخ پوځي حضور پر مهال هم القاعده توانېدلې وه چې د جګړې د پام وړ جوړښتونه رامنځته کړي.
ښه بېلګه یې د ۲۰۱۵کال عملیات دي، چې په کندهار کې ترسره شول؛ چېرته چې د امریکا ځانګړو ځواکونو شاوخوا ۱۶۰ د القاعده غړي په یوه ستر روزنیز مرکز کې په نښه کړل.
د پاکستاني طالبانو تحریک پناهاخیستنه او د کابل–اسلاماباد د کړکېچ زیاتوالی
په دغه شننه کې راغلي، چې نورې ډلې لکه د هند په نیمهوچه کې القاعده، حقاني شبکه او تحریک طالبان پاکستان هم له افغانستان نه فعالیت کوي. په راپور کې راغلي، تحریک طالبان پاکستان اوس په افغانستان کې له خوندي پناه ځایونو څخه د پاکستان پر امنیتي ځواکونو بریدونه کوي چې دا چاره د کابل او اسلاماباد ترمنځ د مستقیمو نښتو او کړکېچ لامل شوې ده.
سره له دې چې د طالبانو د واکمنۍ نږدې پنځه کاله تېر شوي، تر اوسه یوازې روسیې دغه ډله په رسمیت پېژندلې ده. خو بیا هم طالبانو له سلو څخه د زیاتو هېوادونو سره په زیات شمېر ډیپلوماټیکې ناستې کړې دي؛ چین، ایران، ترکیه، قطر، ازبکستان، پاکستان او روسیه د دوی د تعاملاتو په سر کې دي.
سوفان مرکز ټینګار کوي، چې افغانستان لا هم په نړۍوال نظام کې په «نامعلوم حالت» کې دی؛ داسې حکومت چې په عمل کې هېواد اداره کوي، خو له حقوقي او سیاسي پلوه د نړۍوالې ټولنې په څنډه کې ولاړ دی.
کورنۍ ننګونې؛ له اقتصاد څخه تر اقلیمي بدلونونو
راپور د افغانستان پراخو کورنیو ستونزو ته اشاره کوي؛ چې پهکې اقتصادي کړکېچ، د بنسټیزو تاسیساتو کمزوري، د عدلي نظام ستونزې او د اقلیمي بدلونونو پر وړاندې سخته زیامنتیا شامله ده.
په راپور کې راغلي، چې د ښځو او نجونو پر وړاندې د طالبانو چلند لا هم د نړۍوالې ټولنې له سختو نیوکو سره مخ دی. د طالبانو د مشر په ګډون د یادې ډلې دوه لوړپوړي مشران د نړۍوالې جزایي محکمې لهخوا د جنسیتي ځورونې په تور تر څار لاندې دي.
سوفان مرکز خبرداری ورکوي، چې افغانستان ښايي یو ځل بیا د بهرنیو جنګیالیو په مرکز بدل شي. د القاعده مشرانو په وروستیو کلونو کې خپل پلویان هڅولي، چې افغانستان ته سفر وکړي.
دغه څېړنیز مرکز لیکي، چې په افغانستان کې د القاعده چوپتیا ښایي یو تاکتیکي چلند وي او که د ځواک توازن بدل شي؛ نو لوېدیځ ښايي ډېر ناوخته له دغه بدلون څخه خبر شي. د دغه شننې په پای کې ټینګار شوی، سره له دې چې د امریکا حکومت دا مهال له نورو کړکېچونو لکه ونزویلا، غزې او اوکراین سره بوخت دی؛ خو افغانستان ته بېپامي کولای شي جدي امنیتي پایلې ولري.
راپور زیاتوي، چې د امریکا د اوسني حکومت د ملي امنیت په ستراتیژۍ کې د افغانستان نوم حتا یو ځل هم نهدی یاد شوی؛ حال دا چې د سپټمبر د ۱۱مې پېښې تجربې ښودلې ده، چې د افغانستان له پامه غورځول د واشنګټن او د هغه د متحدینو لپاره درنې بیې لرلای شي.
د ملګرو ملتونو امنیت شورا غونډې ته په ځواب کې د طالبانو ویاند ذبیحالله مجاهد ویلي، چې افغانستان امن دی او د دغه هېواد له خاورې هېڅ ترهګره ډله فعالیت نهکوي. د هغه په وینا؛ داعش ډلې په افغانستان کې ماتې خوړلې او اوس یې په ګاونډ کې ځالې جوړې کړې دي.
هغه نن پنجشنبه (د سلواغې ۱۵مه) پر اېکس پاڼه لیکلي:« په ملګرو ملتونو کې د افغانستان د امنيت په اړه اندېښنې بېځايه دي. دغه اندېښنې ځکه مطرح کېږي، چې افغانستان په دغه ناسته کې حضور نهلري؛ څو خپل مستند دريځ او حقيقت وړاندې کړي».
هغه زیاته کړې، ځينې هېوادونه له همدې تشې څخه په استفادې د افغانستان د امنيت په اړه پروپاګند کوي او اندېښنه خپروي. هغه یو ځل بیا ټینګار کړی، چې افغانستان امن دی او هېڅ بهرنۍ ډله په دغه هېواد کې حضور نهلري.
نوموړي زیاته کړې، «زموږ دغه دریځ چې د افغانستان خاوره به د هېچا پر وړاندې نه کارول کېږي؛ په دې معنا دی چې هېڅ هېواد باید تشویش ونه لري».
دا په داسې حال کې ده، چې د ملګرو ملتونو د امنیت شورا په وروستۍ غونډه کې د دغه شورا لوړپوړو چارواکو او د یو شمېر هېوادونو استازو په افغانستان کې د امنیتي ګواښونو، په ځانګړي ډول د داعش خراسان ډلې د فعالیت په اړه اندېښنه څرګنده کړې وه.
دغه څرګندونې په داسې حال کې مطرح کېږي، چې طالبانو تل په افغانستان کې د ترهګرو ډلو د حضور او فعالیت په اړه راپورونه رد کړي دي.
د ملګرو ملتونو د بشري مرستو همغږۍ دفتر (اوچا) وایي، چې تر دا مهاله یې په افغانستان کې ۲.۳ مېلیونه کسانو ته د خوراکي توکو مرستې رسولې دي. د اوچا په وینا؛ له بشري مرستندویه سازمانونو سره یې په ګډه په افغانستان کې د یخنۍ له امله زیانمنو کسانو ته د مرستې رسولو چارې چتکې کړې دي.
اوچا د پنجشنبې په ورځ (د سلواغې ۱۶مه) پر اېکس پاڼه لیکلي، چې د یخنۍ موسم سره سم یې په افغانستان کې له ۳.۲ مېلیونه کسانو سره د خوراکي توکو مرسته کړې او په راتلونکې اونیو کې د ۲.۱ مېلیونه نورو کسانو سره د خوړو د مرستې پلان لري.
اوچا زیاته کړې، چې په همدې موده کې د ۲۲زره ۴۶۷ کورنیو سره یې د غیرخوراکي توکو مرسته کړې او د ۲۰۴۴ نورو کورنیو سره د ورته مرستو پلان هم لري. د دغه ادارې د معلوماتو له مخې؛ زیانمونو خلکو ته یې د تودوخې لپاره سون توکي، نغدي پیسې، کمپلې او جامې ورکړې دي.
که څه هم اوچا د دغه مرستو د پيل او پای نېته نهده اعلان کړې؛ خو د ملګرو ملتونو اړوند بشري مرستندویه ادارې د یخنۍ موسم په پيلېدو او د خلکو د اړتیا په ډېرېدو سره مرستې چټکوي.
په داسې حال کې چې پر افغانستان د طالبانو له بیا واکمنېدو راهیسې یادې ډلې پر ښځو او نجونو پراخ بندیزونه لګولي؛ د طالبانو د امر بالمعروف، نهې عن المنکر او شکایتونو اورېدو وزارت ادعا کړې، چې د روانې اوونۍ په ترڅ کې یې د ښځو اړوند ۹۴ حقوقي قضیې حل کړې دي.
یاد وزارت نن پنجشنبه (د سلواغې ۱۶مه) د یوې خبرپاڼې په خپرولو سره ویلي، چې په دې کې د ظلم، جبري نکاح، مهر، میراث، ولور او طلاق اړوند قضیې شاملې دي. د خبرپاڼې له مخې؛ په همدې موده کې له سوداګرو سره ۱۹۳ اصلاحي ناستې هم شوې دي.
د طالبانو د امر بالمعروف وزارت نن پنجشنبه په خپل اوونیز راپور کې ویلي، چې د هېواد په بېلابېلو ولایتونو او سیمو کې یې اووه کوډګر هم نیولي دي. د یاد وزارت د خبرپاڼې له مخې؛ دغه کوډګر یې په کابل، دایکنډي، فاریاب او بلخ ولایتونو کې نیولي دي.
د طالبانو دغه وزارت تر دې وړاندې هم په کابل او یوشمېر نورو ولایتونو کې د کوډګرو له نیولو خبر ورکړی و.
د خیبرپښتونخوا په پېښور ښار کې د جعلي پاکستاني پېژندپاڼو جوړوونکو او مېشتو افغان کډوالو پر وړاندې په لويه کچه عمليات پيل شوي دي. ځایي چارواکو ویلي، شاوخوا ۴۵ کسان د جعلي پاکستاني پېژندپاڼو د جوړولو، برابرولو او ناقانونه فعالیتونو په تور نیول شوي دي.
دغه علمیات په اشرف روډ، اټه مارکېټ، چوک يادګار، نمک منډي، پيپل منډي او د پېښور کېنټ په بېلابېلو بازارونو کې ترسره شوي دي. د دغه عملياتو پرمهال ۴۵ کسان نيول شوي، چې ويل کېږي د جعلي پاکستاني پېژندپاڼو په جوړولو او نورو ناقانونه فعاليتونو کې یې لاس لاره.
پوليس او امنيتي ادارو د ښار په دروازو کې هم تالاشي پیل کړې او همدارنګه د ښار دننه بازارونو کې یې عمليات پراخ کړي دي. د چارواکو په وينا؛ د مرکزي او ایالتي ادارو په ګډه په ګڼو سيمو کې هم تالاشي پيل شوې. سرچینو زیاته کړې، چې د روژې میاشتې پورې د ناقانونه کړنو، جعلي پاکستاني پېژندپاڼو جوړونکو او افغان کډوالو پر وړاندې به دغه سخت عملیات دوام ولري.
تر دې وړاندې راپور ورکړل شوي و، چې په خیبرپښتونخوا کې د جعلي پاکستاني پېژندپاڼو په قضيو کې تراوسه پورې ۷۲زره ۷۰۳ پاکستاني پېژندپاڼې لغوه شوې دي.