هند د ۲۰۲۶ کال د ۱۹ کلنو کم عمره ځوانانو د کرېکټ نړۍوال جام اتلولي وګټله
د هند د ۱۹ کلنو کم عمره ځوانانو د کرېکټ ملي لوبډلې د شپږم ځل لپاره د ۱۹ کلنو د کرېکټ نړۍوال جام اتلولي وګټله. دې لوبډلې د ۲۰۲۶ کال د نړۍوال جام په پایلوبه کې د انګلستان لوبډلې ته د ۱۰۰ منډو په توپیر ماتې ورکړه او د اتلولۍ جام یې پورته کړ.
څوارلس کلن هندي لوبغاړی سوریاوانشي د دې لوبې او د ټول ټورنمنټ غوره لوبغاړی وټاکل شو.
په نننۍ لوبه کې هند د لوبې پچه وګټله او لومړی یې د توپوهنې پرېکړه وکړه. سوریاوانشي په یوې حیرانوونکې لوبه کې په ۸۰ توپونو ۱۷۵منډې جوړې کړې او د خپلې لوبډلې په بریا کې یې مهم رول ولوباوه. هندوستان په ۵۰ اورونو کې د ۹ لوبغاړو په سوځېدو سره په ټوله کې ۴۱۱ منډې وکړې.
په دویمه پاڼۍ کې د انګلستان لوبډلې په ۴۰.۲ اورونو کې خپل ټول لوبغاړي له لاسه ورکړل او یوازې ۳۱۱ منډې یې جوړې کړې. کالیب فالکنر د ۱۱۵ منډو په جوړولو سره د انګلستان تر ټولو غوره توپوهونکی و؛ خو د هغه ځلېدل د ۴۱۲ منډو هدف ته د رسېدو لپاره کافي نه وو.
د هندوستان په ترکیب کې ار اېس امبرېش هم د ۳ ویکټو په اخیستو سره د خپلې لوبډلې په بریا کې مهمه ونډه درلوده. یاده دې وي، چې په پای کې د لوبې د غوره لوبغاړي او د ټول ټورنمنټ د غوره لوبغاړي جایزې سوریاوانشي ته ورکړل شوې.
