د ۱۹ کلنو نړۍوال جام: ۲ افغان لوبغاړي د غوره توپوهونکو او توپاچوونکو په ډله کې شامل شول
د ۲۰۲۶ کال د ۱۹ کلنو کرېکټ نړۍوال جام نن د هند په بریا پای ته ورسېد او دوه افغان لوبغاړي د یادو سیالیو د غوره توپوهونکو او توپاچوونکو په ډله کې شامل شول.
د افغانستان د ۱۹ کلنو کمعمره کرېکټ لوبډلې د ۲۰۲۶ کال د نړۍوال جام تر نیمه پایلوبې پورې غوره لوبه وړاندې کړه، خو د پایلوبې لار یې د هند لوبډلې ډب کړه.
دغه سیالۍ نن د هند لوبډلې په اتلولۍ پای ته ورسېدې.
په یاد نړۍوال جام کې د افغانستان د نولس کلنو لوبډلې توپاچوونکي نصرتالله نورستاني په شپږو سیالیو کې د ۱۴ ویکټو په ترلاسه کولو سره د غوره توپاچوونکو په درجه بندۍ کې دویم ځای خپل کړی دی.
په دې برخه کې د انګلستان ماني لایمسډن د ۱۵ ویکټو په اخیستو سره لومړی مقام خپل کړ او د پاکستان عبدالسبحان د ۱۳ ویکټو په ترلاسه کولو سره درېیم مقام خپل کړ.
همدارنګه د افغانستان د ۱۹ کلنو لوبډلې تکړه توپوهونکی فیصل شینوزاده په شپږو لوبو کې د ۴۳۵ منډو په جوړولو سره د نړۍوال جام د غوره توپوهونکو په ډله کې درېیم مقام خپل کړی او انګلستان بن مایس د ۴۴۴ منډو په جوړولو سره لومړی او د هند سوریاوانشي د ۴۳۹ منډو په جوړولو سره دویم مقام ترلاسه کړ.
