د ۲۰۲۶ کال د فوټسال اسیا جام؛ اندونیزیا جاپان ته ماتې ورکړه او پایلوبې ته یې لار پیدا کړه
د اندونیزیا د فوټسال ملي لوبډلې د ۲۰۲۶کال د اسیا جام د نیمه پایلوبې دویمه لوبه کې په یوې په زړه پورې سیالۍ کې جاپان ته ۵-۳ ماتې ورکړه او ددې سیالیو پایلوبې ته یې لار پیدا کړه. اندونیزیا چې ددې سیالیو کوربه هم ده، د شنبې په ورځ به پایلوبه کې د ایران د فوټسال ملي لوبډلې سره مخ شي.
اندونیزیا د دغو سیالیو په ګروپي پړاو کې د ۷ امتیازونو په ترلاسه کولو سره د لومړي ګروپ د مخکښې لوبډلې په توګه بل پړاو ته لاړه.
په دې سیالۍ کې اندونیزیا د دوو ګولونو په وهلو سره مخکې شوه؛ خو جاپانیانو په منظمې لوبې سره لوبه ۲-۲ مساوي کړه. اندونیزیا یو ځل بیا مخکې شوه او جاپان بېرته لوبه مساوي کړه. د جاپان یو ګول په پنالټي سره ترسره شو.
لوبه په قانوني وخت کې مساوي پای ته ورسېده او د پنځو دقیقو دوو اضافي وختونو ته وغځېده. په اضافي وختونو کې اندونیزیا په هرې نیمایي کې یو یو ګول وواهه او پایله یې ۵–۳ په خپله ګټه کړه. جاپان په اضافي وخت کې یو ځل بیا د پنالټي ضربه ترلاسه کړه؛ خو د دې لوبډلې لوبډلمشر شمیزو ونه توانېد چې له دغه فرصت څخه ګټه پورته کړي، ترڅو په پای کې اندونیزیا د دغو سیالیو پایلوبې ته لاره ومومي.
