په خیبر پښتونخوا کې د پاکستاني پوځ سره په نښتو کې ۲۴ وسله وال وژل شوي
د پاکستان پوځ اعلان کړی، چې ځواکونو یې په تیرو دوو ورځو کې په دوو جلا عملیاتو کې په خیبر پښتونخوا ایالت کې ۲۴ وسله وال وژلي دي. د پاکستان پوځ په وینا، د هیواد په بېلابېلو برخو کې د وسله والو د له منځه وړلو عملیات به دوام ولري.
د پاکستان پوځ د عامه اړیکو دفتر نن د جمعه، د سلواغې پر ۱۷مه په خپره شوې مطبوعاتي اعلامیې له مخې، د پاکستان امنیتي ځواکونو د خیبر پښتونخوا ایالت په اورکزۍ سیمه کې د وسله والو د شتون په اړه د راپور ترلاسه کولو وروسته عملیات پیل کړل، چې په پایله کې یې ۱۴ جنګیالي وژلي دي.
د پاکستان د پوځ په وینا په خیبر سیمه کې په یوه جلا عملیاتو کې ۱۰ نور وسله وال هم ووژل شول.
د پاکستان پوځ دغه وژل شوي وسلوال «له هند سره تړلي خوارج» بللي دي.
د پاکستان حکومت د تحریک طالبان پاکستان غړي «فتنه الخوارج» بولي.
پاکستان ادعا کوي، چې دا وسله وال په افغانستان کې اډې لري او طالبان تورنوي چې د افغانستان په خاوره کې ورسره همکاري کوي او هغوی ته پناه ورکوي؛ هغه تور چې طالبانو په وار وار رد کړي دي.
