د افغانستان د رسنیو ملاتړ سازمان د جمعې په ورځ (د سلواغې ۱۷مه) اعلان وکړ، چې په کندوز ولایت کې سیمهییزه خبریاله ناظره رشیدي د طالبانو له بنده خوشې شوې ده. د مېرمن رشیدي کورنۍ هم د هغې خوشې کېدل تایید کړي دي.
ناظره رشیدي نږدې یوه میاشت وړاندې له څلورو نورو ښځو سره یوځای په کندوز کې د طالبانو د پولیسو لهخوا نیول شوې وه.
په کندوز کې د طالبانو د امنیه قوماندانۍ مطبوعاتي دفتر د روان کال د مرغومي په ۲۲مه اعلان وکړ، چې د رشیدي نیول کېدل د «جنایي جرمونو د ترسره کولو» له امله دي او د هغې له رسنیزو فعالیتونو سره هېڅ تړاو نه لري.له دې سره، د هغې کورنۍ د افغانستان له رسنیو د ملاتړ سازمان ته څرګنده کړې چې مېرمن رشیدي بېګناه ده او هېڅ ډول غېرقانوني فعالیت یې نه دی کړی.د طالبانو په واکمنۍ کې د خبریالانو او رسنیزو فعالانو د نیولو د بهیر په دوام د افغانستان د رسنیو د ملاتړ سازمان خبرداری ورکړی، چې د خبریالانو په ځانګړې توګه د ښځینه خبریالانو ګواښل او ځورول لا هم د بیان د ازادۍ او بشري حقونو پر وړاندې یو جدي ګواښ ګڼل کېږي.دغه سازمان د طالبانو له ادارې غوښتي، چې د خبریالانو اساسي حقونو ته درناوی وکړي، د ښځینه خبریالانو امنیت تضمین کړي او د رسنیزو فعالانو له نیولو او پر هغوی د فشار له راوړلو ډډه وکړي.د افغانستان د رسنیو د ملاتړ سازمان رییس حامد عبیدي د جمعې په ورځ افغانستان انټرنشنل ته وویل، چې دا مهال لږ تر لږه اووه خبریالان د طالبانو په بند کې دي.تر دې وړاندې، د افغانستان د رسنیو ملاتړ سازمان د خپل تازه راپور په خپرولو سره اعلان وکړ، چې یوازې نږدې ۷ سلنه ښځینه خبریالانو ته په ازاده توګه د فعالیت اجازه ورکول کېږي او له ۵۵ سلنې څخه زیاتې یې له شخصي ګواښونو سره مخ دي.
