د نوبل جایزې ګټونکې ملاله یوسفزۍ وایي، په اسلاماباد کې د جمعې لمانځه پر مهال د شیعهګانو پر یوه جومات شوی برید له دین، ګډو ارزښتونو او انسانیت سره په ټکر کې دی. هغې زیاته کړه، چې د بېګناه ملکي وګړو او لمونځکوونکو په نښه کول جنایت دی.
نوموړې د سلواغلې ۱۷مه پر اېکسپاڼه لیکلي، «زه د جمعې لمانځه پر مهال اسلاماباد کې د شیعهګانو پر یوه جومات برید سخته وېرولې او خواشینې کړې یم». یوسفزۍ دغه راز زیاته کړې، دا یو کرکجن او بزدلانه عمل دی. نوموړې همداراز د پېښې له قربانیانو او کورنیو سره خپله غمرازي هم څرګنده کړې ده.
دا په داسې حال کې ده، چې د پاکستان دفاع وزیر خواجه اصف پر یاد جومات بریدګر افغان بللی او ادعا یې کړې، چې افغانستان ته یې هم تګراتګ درلود. د راپورنو پر بنسټ، دې برید کې ۳۱ لمونځ کوونکي وژل شوي او شاوخوا ۱۶۰ نور ټپیان دي. چارواکو اندېښنه ښودلې، چې ښايي د مړو شمېر نور هم زیات شي.
پر افغانستان حاکمو طالبانو هم د دې برید غندنه کړې او دا یې د جومات د حرمت سپکاوی بللی دی.
