د طالبانو د طبیعي پېښو پر وړاندې د مبارزې ادارې د جمعې په ورځ وویل چې په تیرو ۲۴ ساعتونو کې د واورې ښویدنې او سیلابونو له امله پنځه کسان مړه شوي او درې نور ټپیان دي. دوی زیاتوي، چې دا ویجاړۍ په هرات، فراه، غور او نورستان ولایتونو کې رامنځته شوي دي.
د طالبانو د طبیعي پېښو پر وړاندې د مبارزې ادارې ویاند محمد یوسف حماد رسنیو ته په یوه لېږلي پیغام کې وویل، چې په دې موده کې د بارانونو او سیلابونو له امله شاوخوا ۱۰ کورونه په بشپړ ډول وېجاړ شوي دي.
په ورته وخت کې د طالبانو د طبیعي پېښو پر وړاندې د مبارزې ادارې په یوه یادښت کې د افغانستان د مرکزي غرونو په لمنو کې د درنو بارانونو خبرداری هم ورکړی دی.
د طالبانو د هوا پېژندنې ادارې د پنجشنبې په ورځ د افغانستان په ۲۰ شمالي او مرکزي ولایتونو کې د باران، طوفانونو او قوي بادونو د احتمال اعلان کړی و.
د طالبانو د طبیعي پېښو پر وړاندې د مبارزې ادارې د سلواغې په ۲مه اعلان وکړ، چې په یو شمېر ولایتونو کې د واورې ښویدنې او باران له امله ۶۱ کسان مړه شوي او ۱۱۰ کسان ټپیان شوي دي.
